أنا المشرور

انا المشرور على حبل الهوى ونشفان
انا الزهجان ومادى البوز وجد قرفان
انا الما راعوا فينى حق الجار لا احسان
ولا عرفان
انا الادونى كم شاكوش
انا الجلدونى بى خرطوش
انا الداسونى بالبرطوش
وانا الما ضقت ماكنتوش
انا الفطمونى بى قرقوش
انا الولهان انا العيان انا المبهوط
انا المشرور على حبل الهوى ونشفان
انا المبلول فى سيل العرق غرقان
دموعى تسيل بكاى تقيل وجنى عويل
ضربنى الزول فرد شاكوش رمانى قتيل
دا ما شاكوشو حار وصعيب يشنقل فيل
يعطش حتى سمك البلطى فوق النيل
دا لاشاكوش ولا حاجتين
اظن مدفع .. اظن رشاش
مضاد للريد دا دوشكا عديل
دا خلى رويسى ولع نار
وخلى قليبى حالاً طار
عشان ارتاح
اريت يصدمنى بس دفار
وتتفرتق عضامى تطير
ويطير راسى ويدق فى حيطه حقت جار
يقوم الجار يدشدشو ليك بى فرار