بت هندسة
انا راسى جاط
ما بين هواك والدبرسه
الفت عشرين الف بيت
سبعين قصيده مؤسسه
شان مره الفت انتباها
ومره اقدر احسسا
يا حلوه يا بت هندسه
يا حلوه يا زينة البنات
يا نجمه الليل و المسا
انا رقم اشكال الشتات
حاضن عواطفيك وحارسه
انا فى هواكى بقيت فتات
ودخلت عشرين مدرسه
انا فى هواكى بقيت فتات
ودخلت عشرين مدرسه
جنيت مع كليمات هواك
بى قلبى قاعد اتنفسه
يا حلوه يا بت هندسه
كان شفتى يا بت هندسه
خطواتى دايماً بالغلط
وامورى ديما معكسه
يوم داك مساهر فى الهدوم
وكويتا جت شان البسه
لقيته الصباح حقات اخوى
وهدومى قاعده مكرفسه
كان للهدوم ما مشكله
بشوف لى مصيبتا البسه
لكن هواك اعملو ايه
دش دش عضامى وهرسه
داير لى فرصه اكون قريب
طبله قليبيك افلسه
عشان تشوفى هواكى
كيف بهدل عواطفى ودعفسه
كليماتى ليك اتبشتنت
ما زى زمان متهندسه
حتى الشعر الكان زمان
كلماتوا حلوه مملسه
هسى اتلخم بقى كيف كده
مافيهو كلمه مهندسه
انتى السبب فى كل دا
يا احلى اسباب الأسى
يا حلوه يا بت هندسه
انا ياخ بريدك اعمل ايه
ورينى يا بت هندسه
امشى واكورك فى الظلط
يا ناس بريد بت هندسه ؟
كم مره قلت اقوم براى
واقد معاها واحدثه
لكنى ما بقدر عديل
مابقدر انضم اونسه
خليك من اشرح ليها حالى
وحبى ليك والدبرسه
يا هنايه دا اقوليك كلام
اصلو السكوت فيهو وسوسه
يا ملاك انا بعشقيك
وما اظن بلاك ارجا المسا
دايريك تكونى لى حبيبه
وابقى ليكى حبيب قسا
اكسيك هواى
وتلبسينى نعيم هواك اجمل كسا
ويا ربى كل عاشق نبيل
تديهو زى بت هندسه
وترعاها من عين الحسود
ومن توب جمالك لبسه
ويا ربى تحفظا لى براي
ويا ربي تحفظا تحرسه
