شال الليل هدير

شال الليل هدير واتفجّرَتْ دَهَرَابْتَه
هَزّ العوضه نَمّرْ في القطاطي الثابته
الصَّمُغْ القويّه كَدَابتَه
ماصَه وليَّنْ المُرْبَطْ عِجيل سَحّابته

15 صباح الرَّمْشَه جاري هَرَعْها
السيل ضَبَّحْ الارْضْ والوِساخه جَمَعها
المدفونه في سابع الاراضي قلعها
والوشّاشه في فروع الشَّدَرْ طلّعها

الخَبَرْ المأكّدْ من مُحُمّد جانا
قال الوادي سال واتقالَبَنْ وِدْيانه
زرعو البِذْرَه قامَتْ والعِيال طربانه
سيد البَرْقَه ضَحّي ودرَّجْ العجزانه

شختورِكْ يِكُبْ لمن النهار اندار
فيكي الفِرّه فيكي الكُلْجَه والباجبار
فيكي النوق سَرَحْ فيكي الرِكِبْ دَوّار
فيكي الباتْ ربيطه وبُكْره عاقِرْ دار

الباجه ام مَرِخْ سارحه الغزال بي هويدِكْ
طشّيتْ فيكي لَمّا عطِشْتْ وبرضو بريدك
حَرّاتِك نشيط جايبه الشّكُر بي إيدك
إنْقيبِكْ هَبَرْ عَقَرْ الكِتالَه عقيدك

الباجه ام مَرِخْ دار عِزّنا ومُرْبانا
فيكي الضان وفيكي الهَبْرَبْ الحنّانه
حشّاوِكْ بيعرِضْ انْقَبِكْ فرحانه
هَبَدَتْ نار دفوهُنْ وشَرْشَرو الغرقانه

فيكي القمري فيكي دَباس وفيكي بلوم
وما مامونه من الضبعه والبعشوم
فيكي الدّافِرْ البرقه ومحارب النوم
فلاتِكْ واسعه للبقّاره ودالتوم

بريق الهجعه أطْرَبْ لي دباسك وقوقي
كَبْسورِكْ فَتَلْ شَوّالَه لي فَرْطوقه
إنقيبك بَلَمْ حاشيِ وهَبَر لي نوقه
قنّاصِك شَرَعْ كَلْبَه وجَدَعْ سفروقه

ريلِكْ نَقَّ بي كتاله ومَسَكْلو بطانه
صيّاديكْ قَبَضْ فوق العُقُصْ قَرّانه
فيكي قرين غزال والدَّرْمَه والعَرْقانه
حَوّامِكْ علي الباعجاهْ الحِريشه اتدّاني