رخصة ريد
رخصت متين قلبك عندي
شان ماتتقاطع في شوارعك
وريتك كل قواعد الشوق
ماضيني وحاضرك ومضارعك
هسع بتسوق ليه دون ترخيص
وإت اصلا في الريد ماسواق
حافلة إحساسك بتكركب
وأركب كيفن و إت مابتشتاق
شان بكره تقولي ركبتي غلط
وإتدلي الأحسن لينا فراق
رخصت متين ؟؟
مش قبل أيام
قطعت الشوق الفيك إيصال؟
أنا كنت بحسك فيني جميل
ما كت قايلاك من حال لي حال
مرقت الريد الجواي ليك
حتى الكلمات المابتتقال
أنا قلتها ليك
فاكر قت ليك عينيك غيمه
بتمطر حس من دون أشواق
فاكر قت ليك ريدتي متعلقه
والوحده الجواي مابتنطاق
انا عشته ظروف وأيام قاسيه
وسلكت طريق في وعرتو شاق
وتجيني تقول لي رخصتي
وإت عارف الفرح البي مافاق
رخصت متين
أنا مش وريتك من بدري
قبال ماصفوف ترخيصي يزيد
أيام ما كنت بتتعالى
وإت كت في دنيا الريده جديد
حنستك شان تبقى هوايا
جربت تسوق لكن بتعيد
رجعت أشواقك كم مره
شان خلفك لساو ما أستعدل
قت ليك إتأنى عشان تربح
ومصر في ريدك تستعجل
وأنا عارفه النيل مغبون منك
شان موجو بئن مارخصتو
ومصب الإلفه الكب الريد
قبلت عليهو وكتفتو
وسحابك عارض مطرو
يبيع وتقول لي نيلك بخستو
إذا كان ع الدنيا بتستغنى
وتكتل أفراحنا عشان ماتعيش
إذا أرض الفرحه الشبعانه
بتقلع من قلب الفقراء العيش
تتوقع إنو الدنيا بخير
ترخيصك هييين بترخص
كعبه الأيام الما بترحم
وإت في واطاتك تتمغس
مش قالو الهم اليوم عرس
والزفه كمان كانت في النيل
وأنا كنت بقول ليه
النخلات في عز الحر بلقاها تميل
ورعود الفرحه تزغرد سااااي
ووعود الدنيا غناها جميل
وأنا عارفه الهم من الليله
بلزم مرتو وبقفل بابو
لا الشمس ح تغرب من باكر
لا دموعنا ح تنزل في غيابو
وأنا قلبك مادايره أضرو
لا دايره أكترلو عتابو
وبرغم الهم الفات
دارك بنوت إحساسك ماطابو
والحاجه الزاعجه قليبي عليك
الهم ونخيل النيل أصحاب
والضفه اليومي إحساسه غياب
والقمره الكل مايوم تتعاب
تمرق ترقص من دون أسباب
تدخل جواكا وتتمدا
طربانة وعريانة مبدأ
زي الماعامله ولا حاجه
لا كانت في يوم محتاجه
وتمد يده
معذوره حساباتي الفرقت
والوجعه الدخلت ومامرقت
معذوره الجمله البتعافر
معذوره السمحه البتدافر
حفيانه الرمضه وما حرقت
وتقول لي عايز ترخيصك
لو كان قلبي البعشق جاهز
كان رخصتك
ماكان ذليتني ومغستك
ماكان إسترسل حرفي يإن
كان خليت همي وعرستك
وتقول لي داير ترخيصك ؟