السايقي واصلي
كنا أحسن حالة
وإن كان
ما إتلقى الحكم الاصلِّح
الزمانات كانت أَمهل
المعايش كانت أسهل
كانت المرحات تملح
كان قشيش الأرض أخضر
و الخدار للعين يفرّح
كنا من طرف التقانت
نملا ماعونا و نروّح
كانت المويات حبطرش
و ما مرق بترول بلدنا
بي ضي النجمة الحميرا
أو القميرا نسوق نبوع
و المتر بي فوق
مفروش بالسواعد
شيل نفسنا و ختوا واحد
و فينا قولة الله يساعد
كانت أصدق
و اليتيم للتاني يلحق
كنا نتونس نفاقد
و الرقاب تالا التراب
عرقن يسابق
و العيون بالحر يقطرن
و العريريق تلقا لاصق
في جسدنا و فينا كدّب
بالترابة السودا دابغ
بس تبرّد لي بطننا
قولة الدارعنو فوقنا دا
من قطننا
تمرق الإبر المكيني يجيك وطننا
ثم تلقى الباقي كلو بصارّة ايدنا
و الله ينصر دين بلدنا
و ينصر إخلاص الشغيلة
علي العفاريت الدخيلة
تنكسر ريح العوارض
وتبقى كل الدنيا هيلا
و ما يصح تملاها عافي
و تحيا في أحوال عليلا
هي البتستاهل
رحيق مرقاتا روقاتا و عديلا
و في الحقيقة هي أولى بالخير
من فقر شيخ القبيلة
و الجلاليب الرهيفة
و لمعة الكاب العميلة
بتنا لمن نقول دا نستغفر
كأنو كفرنا بالله بعدنا عنو
مع أنو عارفين الله عادل
و ما في ظلماً جاي منو
و الرسالات السماويات جميعن
عادن الجوع حرمنو
كنا ننضم زي فياقة
في ضليل منقاي نفطر
و القراريص حار فراقا
قمحة سمحة و مو إغاثه
من زارعتا للعواسة
جمبنا الجدول شرابنا
جاي من نيلنا اليطمن
و نيلنا مدعوم من سحابنا
صن و الشاي بي رواقا
وحيو دارفور يارفاقا
سنطتا ونبقا الدقاقا
الجنوب الارضوا عاقا
الله يديها اليخارج
زولا من مطموسا ضاقا
وكب نعكم في الطواري
ونلقى نفسنا في هجيري
بلا المراكبية التمقدف
و البحر فاير دميري
بتنا في حالة طواري
وحظر هاري
وطن تجاري و نيلنا جاري
من الزفاري
الفي الكباري كرم جروفو
عقاب صحاري
قرف يمين ووجع يساري
بتنا نقضم و الوخم
شال فوقنا يردم
الا حالنا و بالنا بنضم
سبع حيكومات
و مالنا كلهن سفّهِن رجالنا
سبع حيكومات
و مالنا كلهن طلعِن خوازيق
كلهن جحدن نضالنا
سبع حيكومات
و مالنا كلهن قلبن علينا
كلهن حرنِن قبالنا
و قولة العمال سواعد الثورة
و الزراع ضراعا
و قولة حماية
الديش لشعبو نفاق اشاعة
الثورة وينا
خزي الجلاليب الرهيفة
الانقلابات المبااعة
انقرعوا يا حكام جرائد
فالصوا تلفزيون اذاعة
نحن ناس الوجعة
عارفين ياتو جيها قلوبنا فيها
معانا بالحق و الامانة قبل نزيها
وياتو جيها تكت و شيها
علينا بالزيف و الخيانة
كفانا قطت
و كانت المرحات تملح
وكنا أحسن حالة
وإن كان
ما انلقى الحكم الاصلح
إلا ما دام فينا حرقة
و فينا فورة دم غبينا
نعز نبينا ومن نبينا
نعز وطننا ومن وطننا
نعزو عالم
من محبة سلام سكينة
غيمة غيمة
ونبتة نبتة وطينة طينة
ما بيصد السيف جفيرو
إلا ترتاح المدينة
و البلاد تفرد جناحا
مع الزمانات الحنينة
و العصافير و الشجر
و جمعة اطفال الفقارى
تغني للمطر البجينا
في الصباحات الطراوة
و الندى الليغسل جبينا
فيا وطن تصبح علي خير
بيكا اصبحنا ومسينا
فيا وطن تصبح علي خير
و الميامين مينا مينا
فروا ضرعاتم بوارق
لي ملاقاة السفينة
و يا بحرنا السايقي واصلي
و ما نضب ذات يوم معينا
و الله كانت ديك عترة
و ياما كم عدلت مشينا
فيا وطن تصبح علي خير
بيك اصبحنا ومسينا
فيا وطن تصبح علي خير
و الميامين مينا مينا