هويتنا الفريك والنيل

بلدنا.. ولا جِنان الدنيا

حتى إن ضاق مداها الحد

نبقنا و لا تمر جيرانا

في الضيق والرهان والكد

وعازة منارة نعتذابا

من أمس الجدود الصانو

حاضر الليلة..

وأحلام بكرة

بي هيبة ونجابة وصد

بلادنا شرافة الليحان

ونبع الخير.. وفجر الجود

وتاج القارة بي شرفاً يخاتفو الغد

عراقة تمد صدى التاريخ..

عقود ناصعات مدى العزة

ومواسم حافلة بالهوبات وما بتنفد

حضارات بالعراقة تَنِزْ

تقود فيض الأحاجي أمد

منارات واقدة بالترتيل

ولالوبةً شروقها ورد

بلاد آذانا ما غبَّ

ولابْغِيّبْ صوت دراويشها البجردو مدد

وياها دليلنا وين ما كان..

تغيب أحلامنا والعشم البفيض يمتد

تضيق آمالنا والآفاق

وفانا عليها ما برتد

قدر كيلات همومنا تفيض

خطاوي حلمنا فايتة العد

وكل ما تنفتح أحزان

تبق وطاتنا بالقيم العليها الرك

بلد معيونة في العِزة

وكرامتا

والنعيم الغض

وأظن محسودة في الايمان

وفي العجمي وفصيح القول

وفوق نيلها البيروي حقول

على المحمية بالعفة

ولهيب تقابة القرآن

وذكر الجمعة

والليل البسوق درويشو فوق للحد

أرض مشكورة بي شيم الجدود لامانا

تستاهل نقيف في سوحا ما تنهد

ونبقى ولادها سيف بتار أوان الجد

بنعرض يوم تضج الدارة بالدلوكة..

والعنج الدواهوا قرض

ويانا الفي حماها جنود..

ثباتنا على هواها وتد

بلد هيلنا وعليها نصول ونتقدل

وبي صوتاً جهور نهتف

سيول الغربة ما بتجرفنا

لي شهد الوظايف النازة

باليورو وبريق أبصلعة..

والدينار

ولا بزغ العطايا الطاعمة

يوم عطف الأيادي تِمِّدْ..

بتطفي لهيب قلوبنا الحار

رزقنا إن جعنا عند الله

وشبعنا على الولي القهار

ونكار الوطن كضاب

أرض شريانها نيل منساب

بحر خيراته راجي صبي نجيض يغرف

يبل اليابسة و يأكد

وظايفا مي مكاتب دولة

لا شيل القداحة المرة

لا السوق لا العمالة الحرة

لا الفارس البقارع فوق مراحاً فَرَّة

دي ياها بلدنا يبقى مصيرنا

وين ما ساقنا قدر الله

وبنلهج باليقين ونقول:

ضراعنا وفية لي أرضا

وحقولها الحالمة بالقندول

هيوتنا الفريك والنيل

وسمرتنا وقيمنا دليل

عليها نمد لحاف أحلامنا عرض وطول

وفيها عشمنا بالتوظيف ولا حيقل

ولا الأرزاق حتبعد عن مداها شبر

هدي الأرض البستاهل نجرتقها

بالمحبة فخر عصافيرها المهاجرة

ترك دغش باكر

ويتجدد صباها فجر

ونكار الوطن كضاب

أرض شريانها نيل منساب

بحر خيراتها راجي صبي نجيض

يغرف يبل اليابسة و يأكد

وظايفا مي مكاتب دولة

لا شيل القداحة المرة

لا السوق لا العمالة الحرة

لا الفارس البقارع فوق مراحاً فَرَّة

ياها أرضنا

يبقى مصيرنا

وين ما ساقنا قدر الله