إنفعالات الحروف
وبي لغة القصيد
قالت:-
شفتك قبل
القاكا وين ..؟
يمكن يكون
بين كرنفالات الأماني..
الضاجة
فى
صمت
الخيال
يومات كسر
فيض الحنين
حاجز عويناتك
تشوف
مشهد ملاقات
المحال
لاقنّى واقف منظر..
طلة خطاويكي
الرهاف
وأنا كنت ماجايب
خبر ..!
أو في بيوتات التمني
وكت صراعات الأمل
موقودة
في كل الحواس
وكتين
مرقتي
من الهموم
ودخلتى بالرجل اليمين
دولة أكونك للأبد
ممطورة بى
صبح العشق
مابين محطات الغرام
الجايبة
من ذاتك علي
أروع تفاصيل
من زمن
محرومة مني بلا زنب
غير إني طامع
فى مناي
بى حجة البحث العميق
لى وردة
ما تشبه
أناقات الورود
الباسمة فى جية
الصباحات
والنهارات
والأماسى ..
الشاردة من فيض الأريج
الما إتعرف
لى أيو زهرة بينتمي
ومن ياتو كوكب
سخرك مولاي تقبي لي
الخريف
وخريفك الماطر يدوب
من قبلِ ما يلوح زمان
كان المزاج مُتقريفك
من قبلو كُت محتار شديد
كيفن أفارق صيف عناي
كُت فيهو بىصبري
العلي
حلمان
فجر بكرة البهل
صدفة ملاقاتك تمر
تبقى لى
وأبقاكى
ونكون
لي رغبة جواي أبتلح
موعودة بى
حرفة مجيكي
ونازفة حنية ومنى
وأنا ياما عشمت الفؤاد
صبرتو
بى كل الحيل
عن زولا بي نفس الملامح
الباقية
حصرياً عليكي
ولابسة
من ذات الصفات الفيكي
جاية
بعد قريب
بترتب الذات من جديد
حتكون الداخل معاك
بتشكل العمر الفضل
لو حالف الظن العنيد
لقياها
في أي الظروف
نرجاها
فى مينا الوداد البري
عند صالة الحظوظ
اللابدة جوات العشم
بتهل
نسوقها ونحتفل
جواتنا
من دون ما تكون
زحمة معازيم أو ضجيج
يفسد ملاقات النفوس
يلاكا نمرق يا فؤاد
نقعد
نجالس الموج دغش
نحكيلو عن
فيض الطموح
ونرتب البحصل سريع
شان ما نمل الإنتظار
أو تبقي خاتمة الأمل
زي باقي صدمات الوعود
العدو
من هذا الطريق
ورجعت محتار
فى العلي
شاكر خيال حلمى
الصدوق
دافق معاناتى القبيل
في حتة أصلاً ما مهم
نرجع نكوسلها من جديد
خلينى لو ممكن .. أقول
شفتك جو الورق
البلمم
إنفعالات
الحروف الصابرة
طول فترة معانات
البيكتبو
فى القصايد
والمقالات
والقصص
شفتك محكرة
فى الخيال
في أقصى حتة مقنبة
ومالياني حنية وهنا
ويكفيني لاقيتك معاي
عصفورة
بتزين الصباح
قمرية
بتحلي النهار
إنسانة
بى حجم الوطن
محبوبة
بتشفي الألم
جيتينى صفحة
بدون نقط
بادرت بالواجب العلي
وكتبت أبقاكى
وبقيت ..!!
وبقيتى حاصد إنتظار
بدل
صراعات الحواس
ناصف
عميري الباقى لي
عوض سنيني وماوقف
شكل
بدل أنفاسي
خلاها أبتسابق
في المروق لي روعتك
شان رقتك
ضجت محطات الوريد
زانت فضاءات الخيال
وبي طلتك
قيم ضلام الحيرة
فى بال العوازل دون فرز
وبرضي حايربي
السؤال
الجاني منك بالحرف
شفتك قبل القاكا
وين ..؟!
يمكن يكون
بين كرنفالات الأماني..
الضاجة
فى
صمت
الخيال
يومات كسر
فيض الحنين
حاجز عويناتك
تشوف
مشهد ملاقات
المحال
لاقنّى واقف منظر..
طلة خطاويكي
الرهاف
وأنا كنت ماجايب
خبر ..!