ريحتك لسه في يدي

ريحتك لسه في يدي.. وريدك يا حبيبة الروح مراكب حالفة ما تعدي ..

و موج الشوق يسوقني عليك تجيبني الذكرى و تودي..

بحبك و كلما اصبر و اقول لي قلبي يوم هدي..

وعدتك اني ما اشتاق و اريتني اكون قدر وعدي ..

وعدتك اني ما اشوفك ..

وبعد لحظات ..

ألاقيك في عيوني الشوف و الاقيك في حياتي ظروف ..

و الاقي هواك جووه يطوف..

وريحتك لسه في يدي

…….

عشانك قلت امشي بعيد.. و اسيبك لي حبايب الروح ..

و اسيبك لي مصير دربك.. و ازيد علي جرحي تاني جروح ..

و اقول ليك اني يوم بنساك.. و يجف دم الهوى المسفوح..

و فجأة يجيني خاطر يقول.. يمكن بكرة تشتاقي

و تطري هواي و اشواقي.. ولو في العمر حظ باقي .. تجيني و تتدفى اعماقي..

عشان كده قبل ما امشي.. بخلي الباب وراي مفتوح..

و قصدي تعرفي يوم قصدي..

و ريحتك لسه في يدي

…….

قول لي لما بتقولي.. تفر الفرحة بي جناحين

قول لي هسه اعمل ايه.. و اودي هواك و ريدك وين

و اشيل من دنيتي الافراح.. و اشيل البسمة من العين

و عارف انو بينا سدود.. و مليونين سبب للبين

و عارف القسمة ما بالايد .. و اقول يمكن تحب اتنين

و اقول ليك قولي للانسام

و لي نجم السما الما نام

و لي قلبك كلام في السر

ولي طيف مرّ .. للأحلام

قولي و خلي قلبي يطير

و خلي هواكي ليّ يقول

و انا معاكي

برغم الخوف من المجهول و من سطوة غرام و حنين

بعاهدك كل يوم جواي

أكون ليك في الضلام الضو

ولو برضيكي امشي بعيد.. سعيد برضاك انا و بُعدي

لكن يا حبيبة الروح.. سألتك ليّ تشتاقي ..في كل يوم يمر بَعدي

و انا المقتول و حي بالريد ..و ريحتك لسه في يدي