سعادتك
سعادتك جميل
واجمل مافيك
أن تبيع انت عادتك
وبرضك تظن انو عادتك هي عادتك
سعادتك
بتحسب انحن بنحبك
وحات الخلق لك علاجك وطبك
ولانا بنحبك
وأوعك تظن انو نحن بنسبك
ولانا بنسبك
نسيبك لربك
هو قادر يوريك مكانك ودربك
دموع اليتامي التسيل ماتهمك
وقلبك شبيه الضلام اليلمك
ودايماً تحاول تخفف في دمك
تكوس ارتياح الجنان التسمك
وأوعك تغُرك سِماية صلاتك
جوامع الفخامة وشوية سِماتك
وإعلام مُضّلل بروج صِلاتك
فهل يوم قيامتك بنور صِراتك؟
سعادتك اخير لك تراجع قرارك
وماتقود بنفسك لنفسك دمارك
كتير البيقدر يوصل شمارك
ولكن خلاص شفنا مربط حمارك
سعادتك متحلم تكون مرة طيب
تشوف الغلابة بعيون الحبيب
لخاطر المحازن تحاول تطيب
دا من انت شافع لغاية تشيب
دوام للغلابة بتقوم ابتعيب
حرام ياسعادتك
حرام ياسعادتك تهين السياسة
تدمِر بلاد الكرم والكياسة
وترفع شِعارات تعم الخساسة
فشكراً سعادتك عملت التدورو
وسبت المعاك ديل يلفو ويدورو
قسمت البلد ياخ وشتت خيرو
وجففت ارضك بحربو وزخيرو
وماتنسى دورك بجيك بعد دورو
وقول للمعاك ديل يلِفو ويدورو
لغاية تلِف بُم سواقي القيامة
وكُل اللي منهُم فقد إحتِرامه
وللمابيقدر يهذِب كلامه
ورافِع دواماً شِعار اللئامه
سعادتك ذنوبك بتكبر علينا
تعِد من حلايب لحدّي الجنينة
إذا طفلة مِرضت بدون انت تعرف
تأكد بأنك جنيت حاجة شينة
سعادتك والله يسامح سعادتك