المجادعة البوشية
المتنرفز الزهجي:
حرررم بوشنا كارب ماهو حِتَّة حشوة
شان تلحق تسفسفو إلَّا تدفع رشوة
لو تمبل كروشنا مع الشطوط في العشوة
تسمع من حداشر كيلو صوت الدشوة
متربص:
وحررم بوشنا كارب كان فطور او عشوة
نمعس فيهو نتمغَّى ونعقب الجشوة
يا نرفوز اخوي يوماتي ناخد غشوة
أفضل من جقاجق أو بواسم تُشوى
المتجهجه الأممي:
البوش انفتح صحنو الكبير القاصع
مدفوس لي اﻻضان ..ما بترفع لي شافع
التلب الخطير ما مخمخنو كوارع
من دكوة وشطوط ..سالت عيونو مدامع
متربص:
والبوش عندي افضل من موايد غيري
واحسن من أطير زي فرة أم زمبيري
من بعد الشبع كربعت موية زيري
يظهر في العيون نومي الملازمو سريري
المتنرفز الزهجي:
نحنا البوش حبيبنا وياهو فضلة خيرنا
ندفع فيهو sharing، مهما يكبر شيرنا
نشبع نحنا منُّو كمان نشَبِّع طيرنا
بوشنا عليهو زيتنا ولا تماطيق غيرنا
متربص:
قعدة بوشنا هيبة وفي العلن محضورة
قدام الدككَّن والكلام في الكورة
في اللاعب الحريف والخبرة والماسورة
في قفة خضار بين الجيوب مأسورة
المتنرفز الزهجي:
قصة بوشنا سمحة وفي القلوب محفورة
لازم قبلِ ناكلو معاهو ناخُد صورة
بوشنا عليهو جِبنة وبي القزاز مكسورة
بوشنا لذيذ مدنكل، حاشا ما ماسورة
متربص:
صحن البوش بريدو وفيهو ساكب زيتي
احسن من لحم غالي ومطلع زيتي
من طعم الشطوط كم يا الصِلَع نزيتي
بالصحن الكبير يا بطني اتعزيتي
مستكاوي:
البوش المحنكش وجمبو كورة الشطة.
خلا ريالتي سالت وقلبي فرفر نط..
والجبنة الدقاق في اللقمة مابتنفط.
ما اروع بهاك عاد لاجداد لا بطة
المتنرفز الزهجي:
البوش المحنكش ما بِخُش تب حوشنا
مهما دنكلوهو محال يكون زي بوشنا
بوشنا الزينتو بصلة وأصلو من قرقوشنا
ياهو فرح بطونا وياهو مالي كروشنا
المتنرفز الزهجي
بوشاً بالمعالق بِتأكِل؟… ما بوشنا
ما بنخسر وحات المولى فوقو قروشنا
حرم ما بِناكلو.. ولا بزورا كروشنا
إلَّا نجيبو سااااكت وجبة لي حنكوشنا
كدرابي :
وفي العام الجديد.. لا (بوش) ولا أوباما
واصناف اللحوم .. ياما نويتلها ياما
أكسح غندهار .. وانا جني أصلو حوامة
وفي الخشم السنون .. شغالة بس خرامة