تجارة الوجع
قال بقيت جلابي .. سويت الوجع راس مال
فتحت محل دموع .. فيهو العيون عمَّال
للبدورلو وجع .. يقولو ياخي تعال
وجعي في الضلوع .. واعصر شوية شمال
إنتاج الدموع بزيد كل عام ضعفين
بقيت أنتج معاهن ريد و شوق وحنين
وسّعت العمل طلباتي تمشي الصين
عشان انتاجي زاد ما عدنا محتاجين
عملت دعاية بالغنيات وجع مبيوع
تشيلك جوز وجع ، نديك هدية دموع
كسر السوق معاي ضوقني لحس الكوع
جبرني هواك .. دخلت تجارة الممنوع
بقيت اسرق نظر منك و ابيع خسران
مسكت السوق براي ، سويت لي كم دكان
عملت فروع .. وصلت سلطنة عمَّان
بفضي الوجع و استورد بخور تيمان
بقيت استورد الفرحة وابيع بالدين
عشان ما بقدر اكسر زول يجيني حزين
ناس ما جوني تاني و لسه مديونين
وناس نكروني عشان ما كنا متكاتبين
جردت حسابي سويت لي مراجع عام
لقيتك فارقة ، ربحي معاك غش و أوهام
حقي عليك يا الظالمة متلنا دوام
ماني عافي منك .. و يجمعنا الحساب قدام