في هوى المختار عقلي شارد
ما بفارق مدح الرسول
يا الهي اجعل لي وارد
ولمديح الخير ديمة سارد
اجمل الالحان والمفارد
تخلب الالباب والعقول
الصلاة عليه ديمة جارد
ولمدينتو دوام ليها شارد
القي فيها الراح همي طارد
بجوار النبي الرسول
يوم ولودو نسيم جانا بارد
والنعيم والخير مثلو وارد
المَحَل وابليس ولىّ عارد
وطيّب الايام والفصول
الرسول للقوم نفسو بارد
مابيعيب خدّام او يزارد
كان خفيض جناح ماهو فارد
نافي للانداد والمثول
هو ساس الخير والموارد
المناهل و علوم شوارد
المحب في حوض طه وارد
من يداهو ينهل نهول
طه حبو ال لقلبي هارد
ديمة سارح ليو فكري شارد
في منامي صحيت غادى وارد
في معية والد البتول
مابسيب مدحو الليا وارد
ما بهاب ل انس جنس مارد
اكوي قلب المابيهو هارد
كيا ليهو الشقي العزول
النسيم المن طيبة وارد
خلي فكري لرباها شارد
القيام للسوح ناوي شارد
اوصل المختار الوصول
الصلاة وتسليم ماهو بارد
للرسول الصافي الموارد
عد ما طير لجناحو فارد
ود كنيش يلقابا القبول