عيب شبابي الما سكن
في طيبة المختار ركن

يا عيوني ليش تبكبكن
ليش تندبن لحظكن
لا تلومن إلا نفسكن
من بعد ما ضاع عمركن
في اللهو ليش تدربكن

أصلو النياح ما بحلكن
غير تبرحن لمحلكن
لحرمُو تسعن غير لكن
جدن مسير لرسولكن
في دارو سوي لكن سكن

باقي العمير ليهو أدركن
بالتقوى والعمل مرّكن
عسى ليهو ربي يباركن
قط ليهو شي لا يعرِكن
ومن كل سوء تتداركن

وغير الرسول لا تنظري
اللينا بشر وأنذري
حالي الحديث والمنظري
الكان يسامح ويعذري
حاشاهو لا هان زرزرِي

الذكرُو زايل للكرب
البيهو نلنا كل أرب
فاق الجميع عجمٍ وعرب
الخالف الماحي إنكرب
والطاعو من كفو شرب

صاحب الجمال في كل شي
زي حسنو قط ما شافو شي
واسع الصدر ضامر الحشي
أنور جبين ناير الوشي
في القامة أوسط وكل شي

النهجو واضح ما غميس
البكرم الجار والجليس
طيب النفس يخفي النفيس
حالي اللهج حلو الحديث
وكل الصفات على هذي قيس

مدحو الفحول لأبي البتول
ما خلّوا شي ما خلّوا قول
زي قولم ما بنقدر نقول
من فيضم نلتمس النقول
عسى نحي للقلب والعقول

أصحاب نبيك دراً سبيك
دق النحاس تنتر تجيك
شقوا الرويس مع الوريك
خلّوا العلوج زي الكجيك
فوقا الطيور تمشي وتجيك

البرق يظهر ويختفي
في ظلمة الليل الخفي
مرات يروح ومرة في
قال لي قوم فوت يا جفي
لسوح نبيك ذاك الوفي

صليت صلا غير عد تنوف
ما صلى مصلّي إلوف إلوف
تصل الصدوق صادق ولوف
بيها كنيش يا من رؤوف
يأمن بها من كل خوف