لامتين المزار يا النور
نزور الأصلو نور من نور
إلهي ال للسماوات نور
بنورك أملا قلبي نور
يكون صافي كما البلور
وناقي سليم ونافي شرور
يجول بمدحو فكري يدور
رسولي القلبي غاوي بدور
نويت القومة ليهو بدور
رسولي الأخفى كل بدور
حل لي قيدي أنا الموثوق
أصل لطيبة المعشوق
أخفف لي لهيب الشوق
وأواجهو بالسلام أروق
أقول يا رسولي ليك أنا جيت
وفي شرك الذنوب اتكجيت
فأدرك ليا يا الناجيت
وبشر قول محبي نجيت
وكيف يضام محبه مادام
محبته ساكنة فيه دوام
أهل الصدق أهل مدام
مع المحبوب مقام قدام
وبثني أشعاري في المحبوب
حسين أخلاق لطيف حبّوب
ذكره ومدحه يمحي الحوب
ويغني عديم ويجلي كروب
كريم الأصل والأطباع
طويل البال طويل الباع
بكفو أروى جيشو إشباع
رؤوف بخدمه والاتباع
رسولاً حسنه فاق ذو الجب
ونوره النيرين حجب
عروجه الجاز فيهو حجب
وخُفف فرضاً لينا وجب
لصاحب الطلعة الزاهية
محاسن غير متناهية
وما قط رد بناهية
عشيماً وكم صرف داهية
صحابة الماحي النبراس
أسوداً في المحاص دواس
خبيرة وفي القتال فراس
يجزوا رقاب ويشقوا الراس
بريقاً في السحر حرقص
هرد قلبي السقيم قصقص
دوار في الرأس معاهو مغص
كضمني ال كنت بتفلقص
صلاتي لسابل الطرف
بعد الرمش والطرف
كنيش حسّن له الظرف
يجاوره غير منصرف