ليلة ولودو
المصطفى المختار الفاق جدودو
أبرك ليالي الله
حي يا ودودو
أكرمنا بالمختار ليلة ولودو
نمشي على نهجو ونلزم حدودو
ونسري لو بالأرواح ليه في بلودو
من غير عدودو
صلواتنا زايدة عليه ناير الخدودو
الجانا بالتوحيد وشرع الحدودو
الرحمة المسداة جات من ودودو
ليلة ولودو
الخير والبركات من غير حدودو
الفرحة والأنوار عامة البلودو
نقرع طبولنا دفوف ونذبح قعودو
ننصب خيامنا
أنواراً لامعة تلوح كاشفات ظلامنا
نفرح بو في الساحات ونصحب غلامنا
لا ننسى للزوجات لا حد لامنا
أصدع بمدحو
خلي المحب يطرب ويزداد في ربحو
لا يهمنا الذمام الخالي قدحو
ينعق كنعق البوم المولى قبحو
نقراها سيرتو
بالمولد العثمان ل الحالي جيرتو
برزنجي يا الأحباب واصل مسيرتو
والفاتو هذا الخير خيبتو وخسيرتو
نواصل الموالد
بعد الختام في مسيد وكل المساجد
فيك يا ربيع الخير نفرح نقالد
بمولد المعصوم في نفوسنا خالد
قط لا تفرّط
في هذه الأيام على خيرها قرّط
اقطع علائقك طر لسواها شرّط
واترك دعيّ وافّاك يلهيك يورّط
صلوات سريعة
توصل ضريح الخير تنمو وتشيعا
من ود كنيش يسلك نهج أب شريعة
ويلزم حدود الدين سنة وشريعة