السرة بت عوض الكريم
جات داخلة زي مرقة غضب من جوف حليم
في زمن صعب رمت السلام زي شنطة
من كتف المسافر بي تعب
زي ردخة رب الله يا رب
قعدت على طرف العنيقريب
المحاذي الواطة
ضايرت التراب كسر العويش الفوقو
شالت بإصبعه وشخت شخيت الله يا رب.
عاينّاً فيها نكوس سبب
للكفرنة وفورة الزهّج من دروة البال الوهيط
ما عودتنا تدس عوج تكتم فرح
زي حالة الزول البسيط
صنقعنا في قعدتنا
راجعت الوشوش دنقرنا
عند رفعة وشيها المتعب الجاد الرحيم
الطيب السمح المعافى رهاب.. رهاب
ينشاف وسيم
إنوهطت فوق العنيقريب القديم
ومن تاني ضايرت التراب
كسر العويش الفوقوشالت بإصبعه
وشخت شخيت وقالت..
تصدّقوا؟! يا ولادي
بقيت أبيت الليل ممحنة في التميرات
القدر فوق رأسه ما خمّت سبيط
غلبه الجرورة الفوق ظهرنا تنزّله
وتطلق وشينا مع الجماعة
إشن دهانا؟! دي كم سنين؟
والحال وقف قط وحلف
ما فيها لو نقاط بسيط كان بوشنا
في حش التمور اللليلي دوشنا مع اللقيط
أي لا حكت هي ولا بقيت
ما كنا قايلين في حياتنا يجيـنا أقسى من المضى
ساعة مرور الإنجليز
قلنا الظلم فات وإنقضى تاريه كمتر
وقام دقون! حلّفي! وعشر!
معيّوقة!
نال?! دمسيس! ضريسي?
وشوك جمال?! ؟
…
الله يارب كربك كرب
عاولي التمور لأرض بور
الناس حطب بجور شهور
غلبان يدور ما فيش مطور
ويجيك بعد دا علم طلب?!
…
الله.. يا ربّ العالمين الما جحدنا نعمتهو
في الشوف والسمع راحة الولادي
ولا قلوبنا عِمن ولا غيرنا دين!
في الجابو ما قصّر حمد
في الشالو ما قلنا لووين
ماشيبوا؟ وين?!
…
عدلت نعال مقلوبة في الجيهة اليمين
حضرت يسار زمناً مو دا
الحيكومة كانت بت حلال بي حاله
بي حرب الجنوب
بي قِلة المال في الجيوب
كانت رخية العيشة
إلا ترا العوين الكبيروا
كبيروا مليسين!?
علمن يطير!?
إن كان هو ما صلّح عوج
ما فادنا شي ومحاق القبيل
لمّيناهيـن × هيـن × هيـن
آ حليل رجالاً سكتن غدراً غشاهن بالقفا
ولليلة سيفن في الجفير يهرج سنين?!
…
دا زمن قواسي زمن ضلالة أوانطجية
زمن حقارة زمن مهين
لاقين هواكن ضروا
ضر يا عسكرياً ما اتّعظ
كتل الرقاب بيودي وين!? !
ضرّي آجلاليباً رهّاف زمماً خفاف
ضرّ يا ضرّر
ضرّ يا دقين!? منسلبطين عرق النبي!
وبالنار بتلعبو يا عوين للحول قريب
درب السلامة
تخوجو بي درب الحرب!
غطيي قلب؟ ولا الحرب
بقرة حليب
والأرض صين?!
ما كان عمل ما كان دا دين!
يا أرزقية تخمجو دم
والدم مو مويا
ومانا طين?
منسليطين في الناس داحين
لامن يجي اليوم الفصل
والحق يبين
وين تمشوا وين تنسلووا وين?!?
وكان طال وكان قصر الزمان
الحين بحين كب يا رجلاً سكتن
غدراً غشاهن بالقفا ولليلة سيفن
في الجراب يهرج سنين?!
…
وإتاوّهت..
وحسّيت
بأعماق الشوارع
والتواريخ المجيدة
إتأوّهت
وأدّتني عين!
صنّيت شِوَيتين..
كوركت..
يا بت..
شمشنا اندهدهت
هوّي
يا بنيّة وكتنا راح
شوفيلّي
شافِع بت فطين
جاء من الطحين?!
الله!!
فترنا من الطحين!!?
وكان الوقت
زالف عصر
عين الشمس
مشدوهة
بي دوشة سحاب
عرق المراكبية
البعاد
راحل
مع ريحة التسّاب
ما تدري مارقة
من البيوت
الحلة
ولا من التراب!?
التاس تقول
مدقوقة
طالعة على الحُقاب
مفلوقة
بي حجر الصعاب
المرة
نازلة على البحر
مشروقة
بي موية السراب
الفرّ
مشنوقة عقاب?
يا الحرّة
كيف بقت الرقاب
مسيوقة
بي قيد السلاب
وإنشرّ
من نشر الحجاب
في عروقه
أشكدّي الخراب?!
من بعد
ما انبلج الفرج
من ضيقْتَا
خدعوها بي حيلة كتاب
رفعوهو فوق
سن الحراب
ودهت الهزائم
خَلقتا
فالناس بدل
عن نقَّتا
التلقي فكة ريقتا
وبدل القصور
الفي الخيال
التبقى ماهلة
كريْرْقتا!!
وما جاتَه راحةً
طلقَتَا
إلا التعمّر
طلقته
في بندقيةً
حقّته
وبي ها الشوارع
وبقتا
تنسدّ منك
دقتا
ودم فلقَتَا
ومُر شرقَتا
ونار شنقَتَا
يا دقن
دينك سرقتا!!?
قطعت وضوهَا
إنشرّفت
مسحت وشيها
إنشّهِدت
قالت نِست
ما تاقّت الأوضة تحت
عند مرقتا!?
دارت تقوم
جَبَد العنيقريب
الحنين
طرقتا
عند نتقتا
رجفت بشيش
رجفت بشيشي
من الغضبْ ولاّ من التعبْ?
فتر السنين?
ولاّ الكبر?
دا الما قدر
يمسح
سماحة خِلقتا?!
زي نيّتَا البيضا
الشعر
ومويّج بحر
كان الجبين?!
مدّيت يميني
أساعده
ردّت يساره
تباعده?!
وقالت لي
أبوي!..
وفّر ضرعك
للبلد?
وأدخر مرّوتك
آ ولد
لي يوم بحين!
أحفض كرامتك
؟تحفضك
الموت!
ولا العيش المهين?
الموت
نفاد الما نفد
الموت
حياة الميِّتين
أختاها جنّة
مع الفقر
وأدخل
جحيم المتعبين
وإن ما قدرت
علي دا
أبوي!
رب لك دقين?!
وضحكت..
حمدنا الله
الحنون
جيدن خلقنا