متين يا الله
متين يا الله ألم الفكه
أجيب الشيلة واسوي الشبكه
أمي تزغرد بي طول صوتها
وأنا مبسوط وظابط الشكه
هدومي معطنة بالأرياح
ريحة الخمره وريحة الدلكه
وأطبق للعيزومة كروت
حاشاها الما زي كرت البنزين
جميله زاهية في ورق التوت
وتحت الإضا ء مشكورين
لأنها لحظة ما بتفوت
وإلا تكونوا مبسوطين
ويجو الأولاد بوجوهاً نادية
يقشوا الفسحة الواسعة وهادية
نركب فيها الصيونات
ونعمل حفلة بود البادية
ولازمن حفلة تكون صباحي
أشفي غليلي وأداوي جراحي
من زمن العذابة الأغبر
السود عيشتى وزاد لنواحي
أفك القيد من قلبي وأغني
حبيب الروح وغني يا صاحي
وفي العصرية نمـرق سيرة
خلـوق منتظمة ماشـة مسيرة
زي صف دكانأً ناسية
فيه سجائر بالتسعيرة
بناتنا يغنن مبسوطات
دور بينا البلد ده
يلفن يدورن العربات
ولمن أصل بالسيف اتقدم
زي الفارس ماشي ملجم
وشي بينضح لمعـه ونظرة
قميصي نظيف وماه مجلبط
بملـاح خـدره
أهـز في البنوت بي سيفي
وابخـبـخ فيهن لبن البدره
وفجأة يـدق صوت الدلوكـه
وتبقى الناس بالجد مربوكة
واحدة تصفق وواحدة تزغرد
وواحدة تلوك في لبان بازوكة
جابوا عروسي وبدت الوقفة
سرحت بعيد في حق القفة
جابت قـون بي رقة وخفة
ما اتجرست كلا وحاشا
الا هنـاك واقفين شمـاشة
قالوا أكيد شارب حرباشة
زعـلت شديد وغلـبني اللعب
لانو كلامن كلو كضـب
قاموا أصحابي بصوت عالي
يا محمد اطلع بره إشاعه إشاعه
وحتماً يوم لي أمك عايد
قونها حقيقي ما اوف صايد
صوت أصحابي أثر فوقي
بحركة ذكية جبت القون
وأنا والحلوة بقينا درون
وفجأة أضفت الهدف الثاني
وغمر الساحـة فرح رباني
مرقوا أصحابي يكوركوا ويهتفوا
فاتوا الفسحة وسدوا الشارع
صوتهم طاغي ظاهر وطالع
يا حمـاده هايل ورايع
جبت القون في الزمن الضائع