الريدة بكم؟

يا سيد الريد الريدة بكم؟
سلفني هواك بديك بعدين
جيتك محتاج ما ترجعني
فرحني وقل مسموح الدين
أديني معاك ملوة تحنان
زيد الواقع روعة وأحلام
أوزن رطلين إلفة وأشواق
مع كل رطل كيلو غرام
ربع الحنية حسابه عليك
زكيني جواك بحناني هيام
شوال الحب لو كان غالي
أديني النص جواهو حنين
باكو الطيبة في رف قلبك
خليه يكون حسابه براو
نزل حبة سعر اللقيات
بدفع ليك من قلبي دماو
خُذ لي شعورك في إخلاص
عينيك وعيني مطلوبة رؤاو
أنا ماشي أشوفك بالإحساس
إنت الداين وأنا ليك مدين
أجمع لي دفتر ديني
الشلتن ديل حسابهم كم؟
داير مني في الحب عمري
بديك الروح وبشيل الهم
شايل منك بسمة وأفراح
وديونك لي أغلاها نعم
هاك الريدة وهوايا سداد
ما سددت مديونتي سنين