تشيل جوالي
في يوم الدعاء المقبول
اريت يتحقق المأمول
وترفع دعوة المنشول
ومولاي ما بيظلم زول
اريت يا الشلت جوالي
ألاقيك الصباح مشلول
ويتفسخّن اصابع ايديك
متل ما بنفسّخ القندول
ويتهيّج عليك مصران
ويطلق فيك سخانة بول
وكل ما تجري للحمام
يكون من جوّه تب مقفول
ويبقى شرابك الاميلين
ويبقى طعامك البنْدول
ضرّوسك ديما يوجعنك
وعليك ليل الماسي يطول
وتقوم لك حبة في لسانك
يغلبك ما ترُد القول
ويصيّبك في وشك ورم
ومن شوفتك يخاف الغول
وتشرب وضمه ما ترُوي
ولسانك بالعطش مسلول
ويغلبك ضمه ما تأكل
وتشتهي حتى موية الفول
وقدر ما يضربو للاسف
يكون الخط دوام مشغول
وزي ما حيرتني وفَت
تعيش باقي العمر مذهول
اصابعن سرقو جوالي
سائل مولاي تتكسر
ويعكر دمك إن شاء الله
زي ما لي صفاي عكر
ادعيك ماني خاطئ عليك
عشان انت البديت بالشر
تشيل جوالي يا فاجر
اريتو يشيلك التمساح
وينطبقن عليك ظلمات
وليلك ما تشوفلو صباح
وطول عمرك تعيش شقيان
لا تنجم ولا ترتاح
تهلوس وانت بين الناس
وقدر ما تنوم تشوف أشباح
وقبل ما تفتح الجوال
يفتح راسك البطاح
تعيش لاك حي ولا ميت
وجودك يبقى كلو مزاح
تخرف وانت لسه شباب
وما تعرف الغلط من الصاح
تحوم وسط الخلق منبوذ
وتعيش متل الكلب نبّاح
وتعيش عمرك مع الاحزان
وما يطُرق بابك الافراح
ويروح عمرك بلا تدري
متل تلفوني داك ما راح
وزي ما لفحت جوالي
يجرك حر لظى اللفاح
وتفتش عني بين الناس
تكوس بعد العملتو سماح
اسامحك … ياخي باااالغت
وما لي غير دعايا سلاح
وماني فاضيلك هسه
دعاي بكملو ليك بكره الصباح