يا السنسنة الحمراء
إسراء بخاري
يا بلد كيفك ..
ان شاء الله حالك زين
وأنا ليك جد مشتاق…
سايقني ليكي حنين
الا البعاد ده عذاب ….
وأنا شن أسوي دحين
اشتقت لي اللمة ..
مع أحلى ناس طيبين
حبوبة تحكيلنا …
حجوات حسن وحسين
والسمحة فطومة
احلاما مرسومة
شالت ف ايدا كتاب
كان تلقا معلومة
غدروها ف رمضان
والزولة مظلومة
كتلوها بالرصاص
وحبوبة مهمومة
وين انتي ي بتي ؟؟؟
وين من أمس فتي؟؟؟
عارفاكي م مُتي
يافاطنة هوووي ردي…
يافاطنة ي سمحة
ي لوزة ي قمحة
بي صوت معاو بحة
يالسوسنة الحمرا
ي حلوة ي قمرة
مرقت علي الشارع
في ايدا كم زهرة
مرقت عشان سودان
كان تلقا فيهو أمان
كتلوها ف لحظة
غطوها بالأحزان
بس فاطنة م ماتت
فطومة في كل بيت
في كل فريق حامت
في شارع العرضة
في بري في بانت
فطومة بس نامت
كل م نقول “آهة”
فطوم تقول “هانت”