كدي اتخيل
كدي اتخيل ..
انو الزمن يرجع ورا
يرجع معاو حلم الضعيف
يقدر يعيش من غير ضرا
ترجع حكاوينا الزمان
تحت القمر فوق الزرع
بين الشجر والمزيرة
يرجع بلد كاسيهو حب
متعري من ظلم القرا
متغدي بي طبع الاهل
متعشي بي لبن القُرى
يرجع زمن.. فعلا زمن
لا فيهو بشتنة الزمن
لا فيهو يد متكبرة
فيهو الورد يعمل ضعف حجم الرحيق البعملو
رد للجميل متفسرة
يرجع زمن عيدنا الزمان
البيو قلوبنا مسكرة
شفع كتار جاريين عليك
عيدية يا حاج الهنا
من يومَداك متذكرا
بس لو رجع… ياخ داك زمن:
فيهو الضمير صاحب
للكان شراو بالدين
والفرحة بتعادي
وقت اللعب بالطين
رغم الشمس تحرق
تلقانا مبسوطين
نحسب نجوم الليل
في حوشنا ملمومين
حبوبة بتجهز
كاسات لبن حلوين
وبتحلا فرحتنا لو:
يرجع زمن كنا
بنغني فيو يا ليل..♪
زمن النعاينلو
يضحك معاك بالحيل
ترويك بس رشفة
من احلى موية نيل
يزرعنا بالهمة
يحصدنا احسن جيل
وقت التقل همك
تلقى المعاك يشيل
وقت الغريب يفتن
نفتح مجارينا
بنجرفو جوا السيل..