آخر زمن

آخر زمن ..!! يا دنيا
يا .. آخر زمن ..
مين كان بصدق لو زمان ـ
حكو ليهو بالمحن البقن ؟؟!!

مشهد كتل حيل الخيال و مروة الروح والبدن
كل الخلوق اتغيرت ..
كل الحقايق .. كل شي ..
ما باقي غير داك السما و هادي الأرض ـ مَدَّ المدى الـ ما اتغيرن ..

كبرت مدن ـ وكأنما كانت بيوت ـ
مخفية في بطن الأرِضْ
نشرت نشور ..
بين يوم وليلة و سيل نفوس
ماجت تجوس جواها في صورة بشر ..
وهي ما بشرْ !!!

آخر زمن ..
يا دنيا ياااا
آخر زمن …
مين كان بصدق لو زمان
شاف شَمْسْ تطلع شان تغيب بس !! وانتهى اليوم والسلام ..

وين الضحى ؟
وين العصير ؟
وين المغيرب و قُبَّة الليل والْحُجا .. ؟
كيف دنيا كاملة بتختفي وتجي دنيا غير ؟

وين الحقيقة و وين أنا ـ اتبدلت و للا اتبدلت ؟
كيفن تغيب بي ناسها و الطير و البيوت
زي ال كأنها في محيط كانت جزيرة و أبحرت

آخر زمن يا دنيا يا آخر زمن
يا انتي ما إنتي القبيل فتحت فيك
يا عيوني كانت في حلم و أنا في حقيقة الحال ضرير

وين الحلم ..؟
طلعت شَمِسْ .. غابت شمَسْ..راح العمير ..
زيَّ الهوا الشايلو الهوا ..!
زي حَلْمة كانت في منام !!

كيف اختلف طَعَمَ الطَعَمْ ؟
كيف اختلف حتى الكلام ؟ !!
بقى من زَبَد ..
مهما كِتِرْ .. ما فيهو خير !!
ما فيهو حبَّة من الصِدِقْ ..

مع اِنو ما بين القَلِبْ واَصْل اللسان يا دوووب ـ أقلَّ من الشِبِر
أو قول شبير !!
لكن بتوحل فيهو خيل .. رايات ملوك .. أقدار رجال .. حتى اللِّحى ..
حتى الكُبار ….

وكأنه ما في رقاد شبر ..
و كأنه ما في سؤال نكير ..!!
حتى الجمال ! الكان محال .. غرَّز معاهم في الوحل ..
راح الغنا وراح الشعر ..

آخر زمن يا دنيا يا آخر زمن ..
مشهد يهد حيل الخيال ..
و مروة الروح والبدن

يا دنيا هل دنية زمان ..كانت وهم ..؟؟
أم حلمة كانت في منام .. ؟؟!!

آخر زمن ..
يا الله بس
حسن الختام .. !!