طبيعة الدنيا
طبيعة الدنيا مرة تعاسة مرة افراح
كضاب البقولك فوقا تب مرتاح
يوم شية تاني نحلي بالتفاح
ويوما كسرة مانلقي ليها ملاح
فلسا احر من صدمة عذاب الويل
هدا الخلانا عايشين بشتنة وبهديل
بعد ماكنا فراسا نصد الخيل
اكل الفتة والطعمية كتل الحيل
الفول غايتو في السودان برا معذبنا
ناكل فيهو ليل ونهار يوم ماغبنا
قروشو شوية كلها موية مابتغلبنا
موية فول وموية زيت وموية جبنة
انا والشلة قعدنا نناقش الموضوع
وقلنا نغير الاكل البناكلو اسبوع
من اليوم ملاح الويكة بقي ممنوع
وللفول بطلنا ولو هلكنا الجوع
بنعمل شيرنق حسب الاتفاق ي سادة
بناكل شية تاني اقل حاجة جدادة
حسن قال لينا عندو ذبون خرق للعادة
تشتري منو كيلو بديك كيلو زيادة
مشينا عليهو قلنا نشوفو كيف نظامو
ماشاء الله لقينا محل كبير بي زحامو
حسب جوعتنا والمشوي الطلق نسامو
غايتو الليلة بنهرس اللحم بي عضامو
سعرو رخيص تقول بالله جايبو هدية
اربعة كيلو نزلناهن وزن بي مية
صاح اللحمة مره وفي اللواكة قوية
لكن جت اكلناها ونفوسنا رضية
وبعد شوية جات الشرطة فوقنا يطوفو
وسيد المطعم المحتال بدالنا كسوفو
مشهد غايتو اتعبني وغلبني اشوفو
عسكري جاي شايل راس حمار بي ضلوفو
سيد المطعم الكان بي انبساطة مشنق
من رفعوهو في الدورية بكي متخنق
نحن بعد وجع البطن الصبح متزنق
فينا الجنة والما جنة سمعتو يهنق