الملاماتي
الحسرة شباك الخشب
فاتح على الحوش الوسيم
نسمة داخلة ومارقة تتعلّم
من الأيام على الحزن القديم
صيف حقّار
خوفِك
ما مرسلو أي زول مشوار
وأنا رغم مستعجل
لغاية هسّه ما فُتَّ اليتيم
بلادي قصادي تغرف من سهادي
الليل عزيز
والدنيا ديم
…….
الناس
آبوا
إلا الرجعة
قالت: دايرة أسافر
تابوا
لكن لسه كاس
الحسرة داير
طابوا
بلادي اتقريفت
ريحة العنابر
غابوا
شِن طعم البغيب
لو ما المقابر
…….
أصحاب
يا شوكة المنفى
أنا حافي الصحاب
وأصحابي حفيانين
من قبل الأمالي
إلى ذا الحنضل الحالي
ما أجمل الشعراء
مواليد الوهم وتسنين
لا يشبه الصّنو
في الهسه بيطّنو
غير
كلهم جايين
ما مخلب المعنى
بل قصدهم ذلك
الفاتِن الفاتِك
ضُفر الطمأنينة القصقصو التانِين
يطرحوك محتار
من شاهق الأسرار
تأكل بكل وقار
نارك مع التنّين
…….
وهم
ضارب بحرقة روحِك الأمثال
ولد عارف وسيم خوفك
غريب الشوك وجر شوفك
إنتي معاهو تمدحي معشر الأهوال
بسلطانك
أي لمسة كنوز
واحسانك إلى الإهمال
بسرحانك
إنتي ضاجة رموز
وذاك المستبد
الزاهد
السئااااال
…….
بلادي
يا شَبَه النجيمة الحايرة
وما خايفة الشروق
شلتي من الشحوب الدايرا
وشهيتي الخلوق
يا شغف اليشوفك دايرة
أباليسك مروق
نارك رحاها الدايرة
جمرك عندو ذوق
تعجني في الغياب باللقيا
وقام بعضك يضوق
يا زاجر الغيوم الدايرة
كان أولى البروق
هاكي من الخيال الدايرا
لو فوقك يحوق
تشبهي في الخيول ما دايرة
وما لاقيا البسوق