الشعر

تاري الأيام بتمرجح فيني
يمين وشمال
بتشل رجلي
وتشيل البال

مواعين الفرج واسعات
وماهلة الطيبة ما بتنضب
غنيوات الحنين راقدات
تفتش للمحنة سبب

اهلاً ازيك حبابك
كيف بقيتي من السماحة
ان شاء الله اسمح
والعوازل علهم مادقو بابك

ما لايماك
لايمة الزمن الدفق حنك
فوق واطاتي
ولايمة الحلم الروج وسوق

نفس النيل فنجان القهوه
خطاوي الشوق ياريد فاقداك
يالعودت مسارب روحي
تهندم حالا و تستناك

عندك زولة قريبة وسمحة
وكل ماتضيق دنياك بتجيها
ولمن تفرح جداً برضو
تشيل الفرحة وتجري عليها

وراك كل يوم البنية اللطيفة
بتجي وتسقي خطوك
رشوشة أغاني وهتافات شريفة

الحبيب في الريدة ريحتو
و النسايم هادة حيلي
عشان قوية
و جايبة سيرتو

ياخ عاين جاي
كان الغيمات تتشتت حن
و انا ذاتي اصن
شان اسمع صوت صمتك جواي

مرق يا السمره عبد صالح
مرق للمدن الرجياهو
خطواتو تزيل في الغربه
من كل درب تاطاهو