ضحوى الليلة زرقن و بالصبيب اتوالى وساقن غيم تعايلو على الصفية فعالا
شفنا سماك محين و بالبروق صاحبالا الله كريم على الشوق الصبح ملالة
عليك نتماشى زي عفرت بحاكى صفاك وليك حروفنا تتوارد ونطرى لماك
الشايقنا رويان من نداك وبهاك شفع ريدنا لازال يلعبوبو هواك
ليالي الخير جادْن من المحبوب نسائم الليل عادْن من المحبوب
شفت في الأحلام ظبى يتهادن برخيم نغمات خلى تنادْن
عبرات الشوق بى ازدادْن تلكم أحلام ليت تمادْن
شفت الحسن الحافل رافل في ثياب العز والعز كافل
سالط في جوابك وفي العرف قاموس وتور عنزة المهوسك قرنو مو ملموس
جرو اللبوة البحوم فوق قجتو الناموس نتر حجر المشارع وطرد الجاموس
مما قم صغيرا ما انذكرت بخيل وعمرك كلو في الشكرات مسويه سبيل
تمساح ليه الكدرو ومكاجر النيل مارق برة ميلين في الصقيعة بشيل
وين يالبري دودة كيده البفرج نار همومي وشري عسفتو العبوس فارس العجاجها يضري
سابل عرضو وافر وحاشا مو متعري دفاع البداني التيه بقون وعشنق
فوق ضيفانو طرباناً بتيتل شنق فارس الدنقلن ندل ضحيوه اتخنق
روى العطشانه في عصر التريه الزنق رحل العندو لي كل ود فراش تقدير
ما بننساق نروح تابعين عجاج الزّفة نجدع توبنا في توب الرجال نتلفه
نتبع من بعد تَحمى ونحرت الكفة والصقر أب خدود كبده وقلُب يتكفه
ما بنتبع نروح لي الغير ونبق سعيّه ننساق بي الخشوم غنماً موالفه رعية
نقِجها عجّة لو بقيت على التبعية والسيف يبقى قاضي المحكمة الشرعية
المهدى سل سيفو يلمع ضاوى فى رسين الكفر ال للشرع بتلاوى
وات سلاحك اللين وللجرح بتداوى مختلفات السيوف الا الضرب متساوي
درقة الرغوة كم دمّرتي ناس ومساكن وكم ذلّيتي بعد العزّة شامخ وماكن
كم صبّحتي قلباً حي متلّجْ وراكن وكم مسّيتي عمران زي مباني سواكنْ
الغني فيك يوسّع ولي الزيادة يكابس في الَّليِّن مخضِّر وقلبو طاري اليابس
بسراع تدّي ضهرك ويبقَ وجهك عابس وحالاً ينقلب عِريَان بعد مو لابس
فرجو قريب حقيقة بروش عذابنا طواها انطفت ام لهيب والطرفة عم رواها
فروعا يابسة مدة الليلة شفنا نواها فتقت جانا ذي نفس الاراكة هواها
السماء غيمة ظل ونجحت البكاية والمحل القبيل خوفنا امسي حكاية
العجمية فرحت وحضنت الكاكاية قرب الري نسيناها وربط وكاية
الليله العرب من المدامر قامو دايرين الرحيل من البرق ما نامو
عقيدن حوش النوق الدبس قدامو دارع البازه والهاري السنين لي قيامو
ستات البوادي البرقن حيرانن ركبو مسفلين فوق الربد ديرانن
ستات الحيا الما زاعلن جيرانن ختن غادي في الصي البعيد فرقانن
الصيف انصرف جانا الرشاش وهبايبو براقو البلوح الحر طفاها لهايبو
رف وساق ورزمن فوق قصيره سحايبو صب مايا كتير والفيخ نفاها دبايبو
فقه الوادي لا عند الغبيات جايبو مطمر عيسي من التالته عشي ربايبو
رسلو للقلب عرب العوالي حقايبو درفونا نجيض فوق البسوكه نوايبو
