مُنَايَ أنَا يَا حَمَد في الدُنْيَا أشُوفَك رَاجِلْ تَمسِك اِسْم أَبُوك وتَسنِد الـمُتراجِـلْ
خَيْرَك إِعُم عَلَى الضُعَفَاء ويَجِيهمُ عَاجِلْ تَبْقَى رَكِيزَه للصَـايْبُـه الزَمـن بِبَراجِـلْ
مِتَين يا عَشَاهِن إِتْ تَكْبَر تِشِيل سَيف جَدَّك فـوق ضَهَر أبْ حُفَافَةً نازَه تَقلِب شَـدَّك
تَدخل في الْـمَجالِـس وفيهـا يُعْجِـب رَدَّك ضِعْيـنَات الْخَصِيـم تَرْحَـل بَعِيـد مِنْ رِدَّك
أنقَت بينا من رِد العناق ام سوح ومسكَت صحرا يات من شافها قال يانوح
عوووك يا صاحب القبة البِكتْبْ اللوح حس سيطانَّا فوق ضهر الردوف والشوح
الليلى الخبير ردالنا نفّا حار وضرب الصهبة خبَّت وشبَّت الحجَّار
قال إنكربو يبقى شرابكن الفنجال دريب السكة دى اخوان فاطنى فيهو قلاّلْ
نجعنا آحلالي قبال السحاب مايستي لامن نسمة الريح قربت بتشتي
انا وعاليبه فارقنا ام شلوخا ستي واواي الوناقيب ليها شق كبدتي
ياالعياله إنقدت دواديب سيلك ابري السيسه واتعني القناف لي فصيلك
دلعناكي كيف طفل الحشا نرافيلك ونقيبك تقول غرنوق خلا بواويلك
وادي الجفر قطعنو عند الضيقه جاهن عتعت ام روب بارن السرّيقه
سيدهن تقّل اللقحات حسب لي الفيقه نزّل تايتو من الساوق الماريقه
كونيبك كبر واتعتّا قفاك حننتو بي الدايوق يبس وانفتا
عينك تابعه طرف البل محل ما شتا ماسك غفرة الكركون تحوم مارُقتا
ياكل فيتريت لامن خبيرته اتملت بشوف سعدانته من ضلعه القصار انسلت
وكت الفجه طالت والجمال انملت جاهن داوي كيف فارس الدواس يتفلت
البرق البعقلولو العطيش في حرور جاب لينا الدعاش قال الصعيد ممطور
اصبح نملو فوق كوم الدُّباب منشور وطربان طيرو هبَّالو النسيم كافور
اتراحَل هرع من غادي جي مَدفور واتحيَّن وقف مِنلم جميع مَّضفور
اشابيب النِّحاسي وصبها المخبور نزلت ديس فِلاني الشبلولُو سِيور
كتير الشد في الخاطر لمي ام براع سكه وفكه اتشكي ونفخلو شراع
نحن الواجب آ هاديه النشيلو كراع وين ماقام شكر بنزيد عليهو ضراع
اسراب القطا وارنب تشوفه دروبه والتمد الببش خابر حلاتو اقروبه
لفيت النعم من القشوش لي الروبه الصايم المسك زمن الشمش لي غروبه
ليلك حر وزنق يا المريي نهارك وعدك جمو قل وعطشتنا ابيارك
سوو كنيش واكلو وشتتوها صغارك وفرحو ولعبو وكتين طارت ام بشارك
سماكي ملقحو عصار زنقة النسام سمومك تقلب الحبي وسحابك قام
مكاييل فك وابلك ودبسب الغنام فقع البضره سيلك وجاب حويل العام
وقفن جميع واتواسن الفرع الفتق كبرنو بي ضراسن
العنج المع النسام بطن بلاسن جبدهن للملايين كيف دبل فراسن
خطفتينا وعنيتي الريع ابوعجات يوم صباحي يوم بتقربي الاوكات
قبضتي جديكي والسراج مقيل وبات فوق النايبو طلقة معدن الجيمات
قصبة عِيَنْ سلولي الكبَّة سايِلْها بي نات البِحور حرَّاتْها شاتِلها
كسرولْهَا التَّرَس مادَّات فرادِلْها وفي وسط الجزاير نيم مِضَلِّلْها
رباعية بقر والقوز مِوَحِّلْها أم حربة الفي الهكاعة مِرَقِّدِي عِجِلْها
وبِت إبِل الشِّروق الحُرَّة في أصِلْها قَرنَت في الدِّهام والحِسْ مِجَفِّلها
