اسم الكاتب: ghaydood

الصباحات فاردة نورا
على ظلالك
والمواجع حالفة تنفذ من خلالك
وإنت شارد من ظنونك وشارب الأحلام في بالك

صباح إشتياقك
بزيد الحنين البسطر حروفك
بخلي العيون اللي فاقداك أصلا
تعد الثواني ومتين بس تشوفك

صباح النعاس البخّيط عيونا
صباح المحبة و بنات الذين
صباح البنية و كلاما و جنونا
صباح ذكرياتنا و شهورا و سنينا

تاري الأيام بتمرجح فيني
يمين وشمال
بتشل رجلي
وتشيل البال

مواعين الفرج واسعات
وماهلة الطيبة ما بتنضب
غنيوات الحنين راقدات
تفتش للمحنة سبب

اهلاً ازيك حبابك
كيف بقيتي من السماحة
ان شاء الله اسمح
والعوازل علهم مادقو بابك

ما لايماك
لايمة الزمن الدفق حنك
فوق واطاتي
ولايمة الحلم الروج وسوق

نفس النيل فنجان القهوه
خطاوي الشوق ياريد فاقداك
يالعودت مسارب روحي
تهندم حالا و تستناك

عندك زولة قريبة وسمحة
وكل ماتضيق دنياك بتجيها
ولمن تفرح جداً برضو
تشيل الفرحة وتجري عليها