شال الليل هدير واتفجّرت دَهَرَابْتَه هَزّ العوضه نَمّرْ في القطاطي الثابته
الصّمُغْ القويّه كَدَابتَه ماصَه وليَّنْ المُرْبَطْ عِجيل سَحّابته
صباح الرّمْشَه جاري هَرَعْها السيل ضَبَّحْ الارْضْ والوِساخه جَمَعها
المدفونه في سابع الاراضي قلعها والوشّاشه في فروع الشَّدَرْ طلّعها
فيها المَرْخ وفيها اتمتَّعَتْ بَرّوق فيها اتْمَجْقْنَتْ لبّاعه اُم طايوق
فايِتْ خيرها داشر برّه مو ممحوق كُلْ ما يكْتَرْ الحاروك عليهو بحوق
رفيقي الدنيا ما سوّت هَوَسْ فوق راسو رفيقاً قلبو مو قرعوبه جابر ساسو
رفيقاً ضارعو بالهاشمي وعِرِفْتَ قياسو رفيقاً في البشوفُن مافي تَبْ ودكاسو
رفيقاً مو الطروره علي التفيهه بدِلّكْ رفيقاً مالو ليك وان انقبضتَ بحِلّك
ما بدورك ملانْ ويعافْ يَبَاسكْ وقِلّك رفيقي الواجِبْ انْ نَطّيت حدودو بذِلّك
طَلْقَة مِن رُشاش الزِّيفَه فوقنا تصَوّي دايرين ينعِم السَّافِل مشاتي الحَوِّي
أهَلْها يعَلِّقو الدَّقْما ام حديداً قَوّي يجيبو رسانة ابو قرون الدِّقاق مِتْلوّي
طَلْقَة من رُشاش لامن سنابَك قام وغاربَك فوقو دُقْن الطّافه من قِدّام
إضْليم حَمْرَكولا الما معاهُ نعام زايِع وفَزْ وخايف ورَفَّعْ العَوَّام
النمة لو بتجيبك غيري مين حبيبك ارض اليباس وراجي يوم صبيبك
يا حارقة جوفي وح قلب الثبات ان زح مكتول هواك لا حمة يوت لا قحه
متغرب بى المداين زى طيرة الجناين انقد في خيالي يا بهرة الرتاين
تتضاري ما بتبيني ولا هماك أنيني اساهر الليل واسوقو بى حنيني
كل ما يهب دعاش ويسارق الساهيت ل ليم الفنْجري وضلي الرهين شاشيت
ل سمح النافله والوجه الصبوح دوبيت ومع الطير البِغَرِّد في الدغش قوقيت
وحنين النوق وقرواح اللقح سوّيت إتَّ ما بتصر جبينك ول الكبار دعّيت
وتفقد الجار ول ضيف الهجوع عشّيت وكُتْ مقنع ولاياك كُتْ طنيبة البيت
هَزَّ جفونو فوق دَوْ الهَرَع قِبْليكي وكَجَرْ توب ليلو دَهَراباً عَقَبْ ضَحَويكي
شَوَايْلِكْ شوقَرَنْ والنَّوْ دعاش راويكي ووطاتِكْ خَرَّفَتْ صَنْقور وَسَارْ واديكي
بادْيَتْنا ام سَمَاح رَيم التَّبَاشير جاكي وهَبَّنْلِكْ رَشَايِم مَزَّرَنُّو سَمَاكي
وَاريبِكْ بِجيبْ هَرَعاً رَحَلْ مِتَّاكي وانْجَحَدَنْ سَمايْمِك والرَّزَاز وَاتَاكي
يومنا القُمنا من ناس دِكَّة المَتْبوره وقطَعْنا الوادي بايتين بي صباح حَمُّورَه
الْبِلْ شَلَّقَتْ فوق الفَجاج مجبوره واخوان فاطني ليها بسوّو طَقْ الكوره
يوم السَبْ عَصُرْ ودّعْنا نحن عربنا بي يوم الاحد قُمنا وعزلنا جلبنا
الفَرَقَه اتْفاسَحَتْ للساعه ما قَرَّبنا شادِّين حيلنا ما جانا الخبير سَرَّبْنا
أيامك ديلا مُسْواكَكْ طَروقَةْ نايْبَك واني مكازيكا في سَنْ البِكار ونقايبَك
تتضامَر واقَصرِّ في البُطان اللايبَك الرّجَع البلد ما جاب خبر لحبايبك
أيامك ديل تغادِرْ في الجَمَلْ زي حاقرو بنهاك مِنّو تبرُك بي صعيدو تناقرو
سَقَديب المِعَضّيهو الحِجِلْ فوق داقرو جاب من دومك الحِبِرْ المهاجِر فاقرو
حشاوك بتعتل لا الشرق وجادولك مخزز قشو عادم الحرق
كان تدريبنا يا الشلتي الغيار للمرق أصبح عيدنا بي غرب ام لعوته الزرقه
رَحَلَت وخَرت ناس سلي وبي دباب القفل جات يا زعم منها لي
قطعت وادي مجرور الحنينها بسلي عند امات لعايت تقلوها تدلي
