العاميّ

في مراسم استقبال حبيبة وكون فسيح
انشداه الجو مسلط
الصباح أول خريف
السحايب سابحة كانت ستة ستة
والمطر مرات يصب مرات يقيف
والشمس تظهر وتلبد

احتويني يا موهط جوة خاطر الريدة فيني
واندفق جواي أغاني حبر أماني
كتب على دفتر سنيني
دي البنية الداسة ريد كل البنات البشبهن روحا النقية

سلم على الطيبين في بلادي يا أسمر
قبل أيادي الطين تزرع حلم أخضر
ودي السلام ضعفين
لي أخوة متسالمين

شفت البسمة الوقعت منك
عملت في واطاتنا عمايل
زرعت بذرة وقامت خدرة
وخلت كل الناس حلوين

هو دا ياتو ليل
بقدر يلم قلبي المحب
قنديل هواي النورو ضاوي درب درب
وحبيتي مشوار صعيب داير كرب

منسية ساجدة سجود سهو
يا ناسية فرضك وهم نسوك
ما كلموك؟
النيل ضهب منك وقت يبطل وضوك

أقصى الوجع إنو صحبك يعادي
يزيد في خصومتك ويرميك عادي
يبشتن حواسك وهو الكان
بكون في خصومتك هو ناسك

شلت من الصيد
عين ونفرة وجيد
القدر مكتوب
تبقى سيد الريد

إكتمال سرب البنفسج
في احتمال اللوحة سرمد
عدة ألوان عندك أحمد
أبهت أولاد عمك أبيض

ابتسامة ذات معنى
تفرح القلب المعني
كل من شافا تمنى
أن تدوم الابتسامة