فرجو قريب حقيقة بروش عذابنا طواها انطفت ام لهيب والطرفة عم رواها
فروعا يابسة مدة الليلة شفنا نواها فتقت جانا ذي نفس الاراكة هواها
السماء غيمة ظل ونجحت البكاية والمحل القبيل خوفنا امسي حكاية
العجمية فرحت وحضنت الكاكاية قرب الري نسيناها وربط وكاية
الليله العرب من المدامر قامو دايرين الرحيل من البرق ما نامو
عقيدن حوش النوق الدبس قدامو دارع البازه والهاري السنين لي قيامو
ستات البوادي البرقن حيرانن ركبو مسفلين فوق الربد ديرانن
ستات الحيا الما زاعلن جيرانن ختن غادي في الصي البعيد فرقانن
الصيف انصرف جانا الرشاش وهبايبو براقو البلوح الحر طفاها لهايبو
رف وساق ورزمن فوق قصيره سحايبو صب مايا كتير والفيخ نفاها دبايبو
فقه الوادي لا عند الغبيات جايبو مطمر عيسي من التالته عشي ربايبو
رسلو للقلب عرب العوالي حقايبو درفونا نجيض فوق البسوكه نوايبو
مُنَايَ أنَا يَا حَمَد في الدُنْيَا أشُوفَك رَاجِلْ تَمسِك اِسْم أَبُوك وتَسنِد الـمُتراجِـلْ
خَيْرَك إِعُم عَلَى الضُعَفَاء ويَجِيهمُ عَاجِلْ تَبْقَى رَكِيزَه للصَـايْبُـه الزَمـن بِبَراجِـلْ
مِتَين يا عَشَاهِن إِتْ تَكْبَر تِشِيل سَيف جَدَّك فـوق ضَهَر أبْ حُفَافَةً نازَه تَقلِب شَـدَّك
تَدخل في الْـمَجالِـس وفيهـا يُعْجِـب رَدَّك ضِعْيـنَات الْخَصِيـم تَرْحَـل بَعِيـد مِنْ رِدَّك
أنقَت بينا من رِد العناق ام سوح ومسكَت صحرا يات من شافها قال يانوح
عوووك يا صاحب القبة البِكتْبْ اللوح حس سيطانَّا فوق ضهر الردوف والشوح
الليلى الخبير ردالنا نفّا حار وضرب الصهبة خبَّت وشبَّت الحجَّار
قال إنكربو يبقى شرابكن الفنجال دريب السكة دى اخوان فاطنى فيهو قلاّلْ
نجعنا آحلالي قبال السحاب مايستي لامن نسمة الريح قربت بتشتي
انا وعاليبه فارقنا ام شلوخا ستي واواي الوناقيب ليها شق كبدتي
ياالعياله إنقدت دواديب سيلك ابري السيسه واتعني القناف لي فصيلك
دلعناكي كيف طفل الحشا نرافيلك ونقيبك تقول غرنوق خلا بواويلك
وادي الجفر قطعنو عند الضيقه جاهن عتعت ام روب بارن السرّيقه
سيدهن تقّل اللقحات حسب لي الفيقه نزّل تايتو من الساوق الماريقه
كونيبك كبر واتعتّا قفاك حننتو بي الدايوق يبس وانفتا
عينك تابعه طرف البل محل ما شتا ماسك غفرة الكركون تحوم مارُقتا
ياكل فيتريت لامن خبيرته اتملت بشوف سعدانته من ضلعه القصار انسلت
وكت الفجه طالت والجمال انملت جاهن داوي كيف فارس الدواس يتفلت
البرق البعقلولو العطيش في حرور جاب لينا الدعاش قال الصعيد ممطور
اصبح نملو فوق كوم الدُّباب منشور وطربان طيرو هبَّالو النسيم كافور
اتراحَل هرع من غادي جي مَدفور واتحيَّن وقف مِنلم جميع مَّضفور
اشابيب النِّحاسي وصبها المخبور نزلت ديس فِلاني الشبلولُو سِيور
كتير الشد في الخاطر لمي ام براع سكه وفكه اتشكي ونفخلو شراع
نحن الواجب آ هاديه النشيلو كراع وين ماقام شكر بنزيد عليهو ضراع
اسراب القطا وارنب تشوفه دروبه والتمد الببش خابر حلاتو اقروبه
لفيت النعم من القشوش لي الروبه الصايم المسك زمن الشمش لي غروبه
