الشعر

تلاته ايام نويح دمعاتي جارية تملي
وين اصحابي وين ايمان ووينو مظلي
وين عمار ووين هتان يجي يكفرلي
شاحداهو الكريم من نوحي بس يغفرلي

مريودتي الحشيمه وبالأدب مفطومه
قلبي عليها ديمه وبعزره ومابلومه
نامت وباله رايق وبيا مي مهمومه
وانا سهران اقللب في العيون إلبومه

معاها عرفته إنو الحب هويه
هدتني فؤاده والروح النقيه
اريده عصارة الخود الأبيه
درفونه وازتني جنس ازيه

زمناً منو يا ستَّأر خطير بالمَرَّة
فيهو قلوبنا ضاقت يا لطيف الزرَّة
الآيس تقول شيطان طلع من جرة
قالوا هجومو أخطر من قنابل الذَّرة

قدُر ما اتفاده ذكر امات سماح واتهرب
عقُب يتجدد الشوق والغرام يتسرب
الموسادو متمكن شديد ومدرب
فرتك لي بتاتاً كان منيع ومكرب

ماك القليل ضرب القواسي بحقرك
في الحر والدواس دايماَ متلب صقرك
بلاع الكبار في عيونو باين نقرك
اوعاك من صديق ان خذ إمكن إعقرك

اعاين في ريش النعام المغتي كتيفه
ولااشقل بالي مع الماتوجد في ديفه
ام فماً دعاش المزن التعقبو الزيفه
تقيلت قدم لكن في الـواجبه خفيفه

البيت الوراهو رجال وفوقو جرارق
حريمو معززات خلقة ونجمهن بارق
وحات اسم الله فوق عينينا نورهن شارق
ولا بحتاجن (السيداو) تجيب الفارق

قلت كبرت واستغفرت ربي وتُب
إلا حسسها دايما في النواحي بدُب
ما سمعوها يوم قالت شتيمة وسُب
عندها بسمة تنبت في القلوب الحُب

أغرب صدفه يومي الجيت ركبت الحافله
وجاورني الجنى الفاكرني بتا غافله
قالي ها ام سماح شايفك تقيله وجافله
قت ليه التقل وفيتو فرضآ ونافله