كلمة زول
للقايل زول بتذل وتهين
او كلمه زول مفتكرة تشين
لا يا مسكين..
لا يا اخوانا المو عارفين
في كلمه زول دي في عز وحنين
ولاها الكلمه النحن بنخجل لو تتقال
لانها ما فيها من الخجله ولا مثقال
وعندي سؤال لكل سوداني
بيخجل لمن زول تتقال
لو كان قاعد في بلاد برة
او كان قاعد جوه السودان
قربلي تعال
يا اخوي كلمه زول
دي بترمزلك للسودان
البلد الملَّه دواخلك امان
البلد الاداك حب وحنان
مليان بالخير كيمان كيمان
لو يوم حنيت بتروح شقيش؟
مو انت مرق من بلدك
دي عشان لقمه عيش؟
لكين لو يوم احتجت اخوانك
يقيفو وراك بتروح ايميش؟
ما اكيد في يوم حترجع لي
حتقعد قدريش؟
في يوم حترجع ليهو اكيد
مليان بالشوق بتكب و تفيض
ومعاك اخوانك
وقت الحارة يقيفو حديد
وتقول لي نفسك
راي الرجعه دا كان لي سديد
وتقيف وترد للكان
بقول ي زول وزي الليك يهين
الزول دي معز الزول
دي رجاله الزول دي حنين
الزول مو ذله ولي تهين
انطم يا حزين
الزول دي نخوة
و خير وبحلفلك يمين
ودحين بقوله بي كل فخر
انا زول وتب
انا السوداني يا اخوي اب شنب
انا اللي الرعد والموج ضرب
انا اللمن اقوم يا اخوي صعب
وانا الزوله البتشبه للرطب
وماني البرفع الشعر ام قبب
وحاش تلقاني بي شيتاً كعب
انا العيني مها وشعري الدهب
انا الزول ايوا بفخربا و بقول
انا السوداني يا اخوي اب شنب
وانا الزوله البتشبه للرطب