يوم ودعتني
يوم ودعتني قلت مسافر
خفت وراك من مر أيامي
ويوم أبديت الظلم السافر
كان في ودك أقصى أحلامي
من عيني بي دمعي الطافر
ليك سطرت غناي وكلامي
يا الساليني وقاسي ونافر
وريدك فيَّا مخضّر ونامي
بعدك صرت ضياع متوالي
عاشق صب بالريدة معذب
قالوا على مجنون وخيالي
وشاعر في كلماته مكذب
قلبي النابض هو لسان حالي
بشرح ليك أسلوبه مهذب
ما بشكيلك من احوالي عن الشكوى
عفيف متسامي
يوم ودعتك وسبت ديارك
أنا ودعت معاك أفراحي
ويوم أمليتو على خيارك
فاضت حسرة ولوعة اقداحي
وكل الكون بكى ليا وشارك قلبي
همومه حزن لا تِراحي
وجيت أسمع لي أخبارك
عسا مرتاح حققت مرامي
منك بهرب شان نتلاقى
مشرقة بيك وجميلة أيامي
يا الفي عمري هواك اشراقة
وقلبي في بعدك دامع ودامي
ما متوقع بيك اتشاقى
بعد ما ضوّت بيك أيامي
بعد ما امتدت بيننا علاقة
فيها ملامح الريد السامي
افصح قلبك عن الفيهو
وسود عمري وسمم حسي
دايمًا نور الحب تطفيه
ريح الغضب الهاجت هسي
وقلبي الذكرى خلاص تكفيه
في ليل الغربة عليهو تمسي
وسطوة ريدك ما بتعفيه
تقسو عليه تزيد آلامي