يا طالع الشجرة
ياطالع الشجرة
ماتجيب معاك ثمرة
ثمرتنا اولادنا
وارضنا هي بلادنا
ياصاحب المركب
قول لي وينو جناي
الفات معاك قبيل
ولدا هميم قرّاي
ومذاكرة طول الليل
كان ماشي مدرستو
للقعدة حنستو
قتليهو داك السيل
الموت قريب بالحيل
قال لي يا امي
ماتشيلي ياخ همي
انا ماشي للحصة
ما تكبري القصة
لازم عشان انجح
عرق الصبر ينتح
باكر اجيك دكتور
المرضى ديك بالدور
والعيلة تفخر بي
واكون مهم في الحي
ووليدي شالو الموج
غرقان وسط كم فوج
مالماتو فيهو كتار
سابحين مع التيار
وبيوت كتير وقعت
وعيون كتير دمعت
وينو البشيل الهم
وينو البزيل الغم
ماجانا زول مسئول
لا يخف علينا القول
لا ساسة مسئولين
شايفين بيوت الطين
شقوا لنا كم من خور
لا شفنا بنيان سور
باكر بجينا الدور
وبيوتنا تبقى خراب
اولادنا يبقوا سراب
ياطالع الشجرة
ماتجيب معاك ثمرة
ثمرتنا اولادنا
وارضنا هي بلادنا
اولادنا ماتوا خلاص
وبلادنا راجية خلاص
ياطالع الشجرة
ماتجيب معاك ثمرة