يا حليل أيام صبانا

لافي زول قرانا مره
لافي زول راجع معانا ..
كنا نتعب ونشقي نحنا
كلو شان ننجح برانا ..!!

الفطور بي كسره بايته
ومويه حاره مع السخانه ..
وبرضو نحترم المعلم
وليهو في الوجدان مكانا ..!!

المعلم كان مربي
وكان بدرس بي امانه ..
كان نزوغ ساعة نشوفو
في الفريق لويوم غشانا ..!!

لافي مدرسه خاصه اصلا
لا في ترحيل لا إعانه ..
كنا دايمآ في الاوائل
رغم اتعابنا وشقانا ..!!

كان طوابير الصباح
فيها انشادنا وغنانا ..
كنا نحترم الكبير
والصغير نديو مكانه ..!!

يا حليلك يا زمان
ويا حليل ايام صبانا ..
كنا بنحش لي غنمنا
وندي غنم الناس معانا ..!!

ولما نلعب كنا نلعب
وكلو زول يسمع صدانا ..
الكبير في الحله والي
واي زول تلقي احتوانا ..!!

النهار نمشي الجناين
نمشي نخرت برتكانه ..
والعصير في الحله نلعب
لوغريب من بره جانا ..!!

هسه راحت كل حاجه
والنفوس صبحت ملانه ..
ياحليل تعليم زمان
هسع التعليم اهانه ..!!

اما تدفع ولا تمرق
والضعيف ماعندو خانه ..
غايتو ربك هسا يستر
التقول قدر الله جانا ..!!

إلا هسه الدنيا خربت
وماشي راجع مستوانا ..!!