يا دنيا ليه
يا دنيا ليه؟ ليه الحروب اللي في الدول
يا دنيا ليه؟ ليه اللجوء وفقد الأمل
يا دنيا ليه؟ ليه سودانا أصبح كله دم
يا دنيا ليه؟ ليه خرطومنا سكنوها الغنم
يا دنيا ليه؟ ليه فلسطين ما زالت بتتألم
يا دنيا ليه؟ ليه مسجد الأقصى ما عاوز يتحرر
يا دنيا ليه؟ ليه الظلم وين العدل
يا دنيا ليه؟ ليه دنيتنا مثل الزريبة عايشين فيها الحمير والبقر
أي زول بمزاجه كل زول باختياره، وين قوانينا الأمرونا بيها الرسل
ناس تضيف وناس تزور وناس تمحي وتجيب الجديد وفاكرين ما في رحيل
يا دنيا ليه؟ ليه الفراق أصبح مصير كل العباد
يا دنيا وين؟ وين أصحابنا وأهلنا البعاد
يا دنيا ليه؟ ليه أحلامنا صارت محال زي الخيال
مثل السفينة بلا شراع، صعب المنال ما في خيار، وبات مصيرنا الانتظار
يا دنيا ليه؟ فقدنا الشغف، عنوانا ما في مزاج زائد، زهج نتفشى في كل البشر من غير سبب
يا دنيا وين؟ وين القناعة والرضى
يا دنيا وين؟ وين الإيمان والثقة
يا دنيا ليه؟ كل القلوب كاذبة
أين القلوب المؤمنة، الصادقة، المخلصة؟
يا دنيا وين؟ وين نلقى تلك الصفات المحسنة مزروعة في روح واحدة؟
يا دنيا كيف؟ كيف ننسى يوم مر علينا.. كان جميل ما له مثيل.. ذكرياته لسه باقية في العقول.. مزروعة في عمق القلوب.. مرشوشة بالطيب والندى.. بس انتهى وكانت نهايته جد مريرة.. وياما بكينا عليه كتير. بترجاك يا دنيا، عيديهوا لنا من جديد، ختيهوا في فيلم عديل وأعرضيه للجميع
بالجد آسفين يا دنيا، حقك علينا، كترنا عليكي الأسئلة واحترتي ذاتك في الأجوبة، بس بسألك آخر سؤال
يا دنيا وين؟ لي وين تودي لي دروب خطواته قاسية ولا نور دروبه واسعة