يا أعز الناس حليلك
اخر قصيده كتبها الشاعر مرهف الاحساس اسحق الحلنقي في رثاء فنان افريقيا الاول محمد عثمان وردي رحمه الله
يا اعز الناس حليلك وانت حاضن العود تغني
وقلبي السارح في الغناوي الطالعه منك وشيله مني
عندك انت الفن رساله تزرع الايام تمني
يا حبيب كل الغلابه غبت وين الليله عني
غبت يالشوق المهاجر وانت لابس الشوق حرائر
غبت ما شفناك بتشرب من عسل احساسنا زائر
وانت لو رديت عليك يا وليف عمري الدوائر
زهره المقرن بتلبس من حروف اسمك ضفاير
يا سمح يا زين حليلك في السمح قبل السماحه
العصافير ليك تهاجر وبيك تعود ابيض جناحه
الجراح الفي قلوبنا بالنغم داويت جراحه
ومنك اتعلمنا نغزل من دموعنا النازله واحه
نحنا ما بنمسك دموعنا لما نسمع لو بهمسه
اما نور العين غرامنا مالو لو اهدتنا لمسه
وانت يا وردي المشاعر يالبقيت للموجه مرسي
كيف اقولوا عليك مفارق وانت في اعماقنا لسه
قلت ارحل وجيت رحلته ومارحل أبداً زمانك
السحابه الفوق بتسقي وردة الحزن عشانك
اوعي تمشي وتقول مفارق انت اسطوره زمانك
انت ليك انغام بتشتل في القلوب ازهار حنانك
يا اعز الناس حليلك وانت حاضن العود تغني
وقلبي سارح في الغناوي الطالعه منك وشايله مني