اكتب ليك كلام
عوض أحمد خليفة
نفسي أكتب ليك كلام
تقراه إنت براك وبس
تبدأ القراءة حرف حرف
وتعيدها بلغة الهمس
كلام يثير فيك الشجون
من زاتي لزاتك يمس
تشوفه في لغة العيون
وكت العواطف تتحبس
كلام يصل بيك الجنون
تلقاه في ليلاك شمس
ونفسي أكتب ليك كلام
تقراه إنت براك وبس
نفسي أكتب ليك كلام
يدخل مشاعرك وينعشه
وتحسه في قلبك سلام
كل يوم حرفه تونسه
يصحي فيك نبل الغرام
جواك ريدتي يوشوشه
وتشوفه لغيرك حرام
كل يوم روحتك جرسه
ونفسي أكتب ليك كلام
يدخل مشاعرك وينعشه
ونفسي أكتب ليك كلام
ما قالوا عاشق لعشوق
كلام يخشّك بالمسام
وبيك يحلق ديمة فوق
ينسيك أيام الخصام
يتجاري في الدم والعرق
وتقرأه بنشوة وهيام
في كل كلمة تقيف تروّق
ونفسي أكتب ليك كلام
ما قالوا عاشق لعشوق