سلامات
ســــــــــــلامــــــــــــات
عشان إحساسنا دايمه رزِين
فيهو أصالة الخوّة
وفيهو معاني من جوه
نربط خيطنا بقوة
عشان دايمًا نكون حلوين
قريب وبعيد متكاتفين
نحن الدنيا فيها ضيوف
تعالوا نعيشها متحابين
ونرسم صفحة الأيام
دنيا جميلة حب وحنين
تعالوا نرتب الفرحة
يوم بسماّت ويوم ضاحكين
تهيم بالفرحة أرواحنا
ونذكر الله ماناسين
ينبغى من نفوسنا جمال
يفوح وينثر عبير ياسمين
يطيب خاطر المجرّوح
يبل ريق البعاني سنين
تعالوا نعيش ونتسامح
وكل محروم يلاقي حنين
تعالوا نوزع الفرحة
تعالوا نمد أيدينا
نرفع أي زول واقع
تعالوا نقدّر البكبر
نحب ونوقر الشافع
تعالوا مع بعض نهتم
نتفقد جارنا لو جائع
تعالوا الدنيا عمرها كم
وبكره بفوت وما راجع
تعالوا إسي نتسامح
تموت بذرة خلاف فينا
نعيش نزرع سهول الود
يخضر يحلى وادينا
وعشان كل زول يعيش طيب
ونهدى الناس وتهدينا