صدق القال

صدق القال جروحك ما بتوجع زول
وصـدق القال همومك لو شكيت بتطـول
ما كل الكلام البنفعك معسول
وما كل الصداع بيعالجو بالبندول
وما كل التريدو مؤكد انو بريدك
وما كل البيضرب ليك بهمو جديدك
الريد بالغصب لا بنفعك لا بيفيدك
وزولا ما هو ليك اختاهو وارفع إيدك
وما كل البيضحك ليك تبقى حبيبو
وما كل البيغلط مره انت تسيبو
الأيام كتيرة وكل زول بيلقي نصيبو
والرجل مواقف ما بيقيمو بي جيبو
وما كل البقابلك بي بشاشة يغرك
وما كل البصحبك تديهو حالا سرك
الليلة البيضحك ليك ويقاسموك مرك
باكر ياهو زاتو في النهاية بيضرك
وما كل البمد إيديهو قاصد يسلم
وما كل المسك قلم وكتاب متعلم
وما تجرح مشاعر الناس وليها تألم
وفكر في الحساب يوم قبرك يبقى مظلم
وما كل البتحلم بيهو دايما ساهل
وما كل البقولو الناس حقيقه وحاصل
ما تصدق كلام الناس ودايمه تجامل
ولو جنو الخلوق خليك براك العاقل