مساء النيل على المقرن
أزهري محمد علي
مساء النيل على المقرن
مساء النيل
محل ركِّت عصافيرك
وصفِّق لجناحو فَنَن
مساء الموية
والخضرة والوجه الحسن
مساء الخاطر الطيب
صفاء النيّة .. حسن الظن
سنين الغربة ،
والعمر البعدك سُدىً
مساء النيل ..
إذا ضاقت قلوب الناس
فتح راحة ضفافو وطن
مساء النيل على المقرن
السنوات مضَن يا مافى
والأحزان علاها الشيب
تترامى المنافى منافى
والأقدار في حكم الغيب
يتقطر جرحنا قوافى
لو هجرت حبيبة حبيب
فيا خلى الخليل الوافى
يا حامل المسك والطيب
حزين قلب الغناء المغبون
يفتش نبعك الدفّاق
ونتشرف نعاين ليك
فتّر خطونا الساساق
ولمّا النيل سأل عنك
الجواب كمل ما حاق
ولا حتى الخطاب منك
يبلل حرقة الأشواق
بتتدخل في قلوب الناس
مع شمس الصباح رقراق