مرق مغصوب
هو كان لامن طلع منك
ماكان همو كوم احلام
ولا كان همو راحة بال
ولا عيشة الرفاهية
ولا كنز الدهب والمال
هو بس كان ببتغي السترة
وشوية انفراج للحال
ويمرق من بلاد ما كان
بتبكي وكت بكو الاطفال
وتنذر بضلام جاي
وشوارع ما بتدي الفال
وصخرة من الفقر واليأس
تحطم موجة الامال
مرق مغصوب
ولا فرحان ولا مختال
درع في كتفو غنية حب
بقت حاجات ملازماهو
وتقيف بين حلو والترحال
محل يرحل يشوف وطنو
الجثم بين الفساد بالدين
ولعبة شلة الراسمال
وبين حاجات تودي المنفى
ودم شارع المطار السال
رجال كانو السند والراس
رجال فاتوها يعني رجال؟؟
يقوم يبكي
ويبكي قدر همومو هموم
يسب في الفاسق الدجال
هو لا اتعود على الغربة
ولا همو الهناك انشال
يقوم من نومو كل صباح
يشوف عمر الحنين قد طال
وجات يوم وجعتو الليلة
هتف بكل ما في الحس
همس بضحكة موجوووعة
دا استقلال
دا استغلال
دا استقلال .. دا استغلال
دا است ق لال
دا است غ لال