مافي زولاً فينا كامل
مافي زولا فينا كامل
الكمال لله وحده
مافي زولا فينا أبقى
البقاء لله وحده
كل زولا فينا هالك
حتى ملك الموت ده راحل
أوعَ تستكبر وتقوى
الكبير والأقوى الله
خلي حشمتك التواضع
أرحم صغير.. أطعم فقير
أقصد مشيك.. أقضض في صوتك ونبرتك
املأ نفسك بالقناعة
الأرزاق مكتوبة جاية
ديمة حافظ على صلاتك
وللأرحام خليك مواصل
كتر الصدقة القليلة
وما تتباهى تقول دة عندي
كلو زايل ودنيا زايلة
بتمشي هناك لي عالم تاني
عالم فيهو تكون وحداني
لا أحبابك.. ولا جيرانك.. ولا أصحابك
حتى حبيبك الما بسيبك
ياهو برضو الليلة سابك
حيشوف بديل ويعيش حياتو
ديك أعمالك في الميزان
هي البتقرر ليك مصيرك
إما الجنة أو النار
عاوزه أنصحكم يا أحباب
عيشوا حياتكم بالأخلاق
ربنا شايف.. سامع وعارف
كل البحصل في دنياك
ما تحسبوا غافل
أرجع وأسجد ليهو باكي
واستغفر مرة وتاني وعاشر
وللقرآن ما تخليك هاجر
اقراه بخشوع بنية صافية
يزرع جواك وئام وسكينة
وكمان يخلي روحك صافية
تقابل الناس ببسمة بشوشة
بكلمة صادقة.. نظيفة حروفها