معليش بتخفف أوجاعي؟
معليش بتخفف اوجاعي؟
بتزيل كل هم كان امبارح؟
معليش بتجفف دمعاتي؟
او تقتل كل كلام جارح
وانا كيف اضمن حتمشي عديل
والخوف جواي نازل وطالع
كيف يقبل قلبي عذر منك
وأنا كل ما اجيك وأدق الباب
ألقاك كضاب
أحلامي معاك رهاب في رهاب
رامي الريد في نص الشارع
لو عندي ملام تملاني كلام
وعود وعود وخداع وظلام
وتقول معليش؟
طيب سامع؟
خت يدك في قلب الاوجاع
كيفنه بدق
بسراع بسراع؟
هل وريتك
بأني بنوم وانا كلي صراع
مابين اهواك او اهوى سواك
وبجيك بحب بديك صاعين
من شوق وحنين
بترد بصاع
وريتك أنه بنات الريد يوماتي
بيبكوا وينوموا جياع؟
لا مرة شكيت لا يوم مليت
بس كنت بجسد ريدنا قصيد
والريدة بيزين توبها يراع
وتقول معليش؟
معليش لشنو
بتسوي شنو؟
معليش م بتجبر بالخاطر
مرات بتزيد فينا الأوجاع
بتحرك كم طاقات من خوف
لا بتشفي ولا بتبل الجوف
وإحساس الفرحة أساسا ضاع
معليش ماا كعبة ولا بتكعب
بس سمحة وقت تتقال بصراح
تطلع منك مليانة حنان
تطلع منك في الزمن الصاح
تطلع منك في شكل أفعال
او فيض تحنان بالحيل دفاق
أو تبقى حبيب لمن اشتاق
لمن احتاج ألقاك رفاق
كلمتك وريت احساسك
اهواني عديل
ما تكون رقراق
اكرهني عديل
او فارق ياخي
كفاك تضليل
ماليني نفاق
معليش أنا دي
ومعليش للريد
معليش لشوق
يوماتي بزيد
شيل معليشك
واتلاشى بعيد
أنا ردت عيونك
بدري شديد
ومليتها حنان
لكن غلطان
الحب بالطن
مع حسن الظن
الشوق والحـِن
غلطانة أنا؟
غلطان الريد؟
غلطانة أنا؟
غلطانة الريد؟
غلطانة انا
وماتقول معليش