ليه ما أغسل العدة
ليه ما أغسل العدة
وكيف ما أغسل العدة
وجواي تضحيات من أم
شقت لما الزمن عدى
وأخوات أبدعن في البيت
تفاني وألفة ممتدة
كفوف بالموية والصابون
تغسل من زمن بدري
دا بس بالله كم ماعون؟
قبل ما أفهم المضمون
واستوعب لما يجري
شنو الأنا يعني سويتو؟
إذا كان النبي المختار
بكل الرحمة والإيثار
بساعد في أهل بيتو
فمن أنا شان أكون سلطان؟
أقوم من كرسي لي كنبة
وأستنـكف مشي الدكان
وأعمل كل يوم غلبة
بكون كدا باختصار وهمان
وفاهم الدنيا بالقلبة
وكيف ما أغسل العدة؟
وأحس في الرغوة والليفة
بنظرة مضيئة من ذاتي
رحابة أمي وأخواتي
وقيم أعجزني تصنيفا
تعالي كلميني يا المصفى
ويا الكفتيرة وريني
ملامح هذه الوصفة
لعلو الهمة تهديني
وأساعد قدر ما أمكن
أغسل أقلو كبايتين
وأتمر بي عناية صحن
بقول لي كل من يسخر
أنا الرجل الذي يفخر
بانو بغسل العدة
وفي فهمي الرجولة الصح
ثقة وطاقة عطاء وسماح
ويا من سوف تتحدى
بقول ليك بضمير مرتاح
رجولتك ما شنب مفتول
ولا عين حمرا زي الغول
دي رحمة وتضحيات وأصول
تبين في الرأفة والشدة