الشعر

جرحت ليه خاطر الحبيبة ؟
الحبيبة
المشطت عصب التضاريس
وهدت على كل الخرايط .. والفراغات
مدهونة بى لونا أرصفة المحطات

طريتك ليل وبرقا في المشارق لال
وبلل العين زي دمعي المحقن شال
طريت الطيبة طيبة أمي
طريت فرحي وطريت المي

المسافات مابتقصِّر توب حواس العاشقين
العيون البشتهيها ، والبسيمات المشاغبين
الغنيوات الحلاتن
وصوتك الكاتلني حين

بتكبر معاك الاماني الحميمة
وتفرهد بسيمتك عصافير رحيمة
بريدك قدر مابتشيل الدواخل
ومافاض بيضلل سماواتنا غيمة

شوقي ليك ابواب وابواب الا في الصبر الترابيس
والمسافات كل ماطالن خطاوي القلب خِمّيسيس

الهميمة وقت تقوم…
تنفض الأسى والهموم
تستعين بي الله سراً
وتمشي في عز السموم

نِغيم من كركبة عِده
دا معنى البيت
وضربة شافعه لي اخوها
ويسُكها الا يتسدى

ضحكة… تبلّ الريق
ضحكة بتفتح بين أشجار البهجة طريق
توْسَع كُلْ ما الدنيا تضيق

حقيقة بقولا ما بحلم
غصبا عن عيون الهم
وعن كل الضباب الجايي والمبهم
وعن زمني الصبح جاسوس
يهرب للحزن خبري

ما اتوسّدت مشاعرك نزوه
ولا تعويض للعمـــر الضاع
أنا فتّشت جواي
ولقيتك