بس كنتا ديمه بعلما
بس كنت ديمة بعلما
انو الحزن ذاد الفرح
والفرحه نفسها مؤلمه
والعافيه اسمح منها
لو حتي كانت بلسمه
والشمس في توب من حلال
والقمره اكبر مجرمه
وكضابه ما بتحلب لبن
القمره ما بتحلب لبن
وملانه زيف ومهضلمه
وممسوخه مهما اتبرجت
ما ذي مصابيح السماء
والقدرة ما بتنفات شبر
والسترة ميها الكمكمه
والناس سواسيه كالمشط
والحرة دينا ملجمه
والحلوة ما حلوة طعم ؟
والمره ربنا قاسمه
والقسمه ما باليد كمان ؟
الايد هي زاته مقسمه :
اصبع صغير
واصبع كبير
واصبع وسط
واصبع نضم
واصبع بدخل خاتما
وتفرق بداية الشوق كتير وكتين تصل للخاتمه
ما الريده بتشوف بي تحت
والحب موشج بالعمى
وما بفهم النور الا زول عاش في دياجر مظلمه
النجمه ما بتعني الوضوح
العتمه ميها الهضلمه
الوشمه ما نزف الجروح
والبسمه عز البفهما
ما النسمه في الصيف لو تفوح
تحرق حشا البتنسما
والوجعه بااااااااردة علي الببوح
وبتسل رويحت البكتما
والروح بتمرق ما بتموت
والجته بتقيم مأتما
ونحنا انعكاسات للنجوم
والواطه ضل راميا السما
* * *
وانا ما رميت اذا رميت واي عاشق ما رمى
وضحك المشيب برأسه فبكا ونادا سلما
وسمت بغاث الطير حين كبا حزينا” مرغما