أقراك صاح
خليني أقراك مرة صاح
عكس إحتشادك في الحضور
هل غاب معاك وعي الطريق؟
.. أم بيك زكـّانى الزمن
ماشيك .. وعارفك يا حريق ..
في يوم غماماتك .. بجن
فرهد غيابك .. أغنيات
ظلت أراضى اللقيا بور
بلقاك يا كل الطيور ..
مسجونة والحرية .. سور
وبلقاك بيناتنا الثبات
وبيناتنا شمس البكرة في لحظة .. مخاض
*
طول الوجع رشـّح مواطن العافية .. فيك
خلاني أرجع وأبتديك
وأقراك من كل الجهات
ومابين أقابلك .. ومشتهيك ..
كان حلمك الأول.. ترفْ
وكنتي الصبية الغايبة..
في زحمة حجا .. وكلمة شرف
كنتي الزوايا الميتة .. في متحف خزف
كنتي الوصايا العشرة .. واللون الشحيح
***
سميت مساحاتك حكر
كل البيحلمو ا بي الشمس..
هجـّرت من واقعك .. عبث
سكـّنت فيك ..ضد السكون
كل اللي كان ممكن .. يكون
وطارت ضفيرتك ليل غنا
جدلة صبُر .. وطولة نفس
***
ومابين أقابلك وجيت عليك
كان عندى ليك بس نحنّ .. والجرح الثري
وخيبة أمل أم الشهيد
في الكلمة .. والوجه الجديد
وكان إحتقان نبض الزمن
نومة طفل .. فوق الدّمن..
يا صاحية بي الحاصل عليْ
يا نايمة عن فقري البليد
سميت مرافيك الوطن
صبحت مناحاتك .. نشيد