انا محتاج

ممكن سلف حبة فرح ؟
أنا قصدي بيكم استعين
ممكن الاقي بريق أمل
أو منكم القى اليقين ؟
طيب منو البقدر يشيل
من دربي حزناً لونه شين ؟
أنا عاوز لي بس حبة فرح
ممكن تقولوا ألقاها وين
و أنا عايز لي صاحب وفي
لا عمره يجرح لا يخون
لا واشي يفرق دربنا
لا يوم تخش بينا الظنون
يمكن دعوع حزني الصديق
و يفرح و يدمع لي عيون
ممكن الاقي صديق كدا ؟
و في صديق كدا أصلا بكون ؟
و أنا برضو محتاج لحبيبة
تسمع كلامي بدون همس
محتاج لزوله تعرف تحب
تعرف تقاسمني النفس
تعرف معاني الود شنو
من غير أقوال تعرف تحب
تعرف حقيقة الريد شعور
إحساس بدون ما يتلمس
أنا عايزلي زول يبقى الفرح
يبقى السعادة علي الدوام
زول يفهم الريد النبيل
يعرف يعلمني الهيام
يديني إحساس بالأمل
يملّني إحساس بالسلام
زول عادي جدا و مختلف
زول اعلى من وصف الكلام